İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 887 Hüküm no: 1210 Orijinal metin no: [129b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hacı Hasan’ın satın aldığı değirmeni kendisine teslim etmeyen Lefter v. Nikola aleyhine açtığı davada haklı olduğu Havâss-ı Refî‘a müzâfâtından Çatalca nâm kasabada Hürrem Ağa mahallesinde sâkine Ayşe bt. el-Hâc Hasan tarafından husûs-ı âti’l-beyâna vekîl-i müsecceli olan Hasan Efendi b. İsâ mahfil-i kazâda, merhûm Ferhad Paşa vakfına hâlâ mütevellî olan umdetü’l-emâsil ve’l-a‘yân makbûlü’s-sudûr ve’l-erkân Abdülbâkī Ağa huzûrunda zikri âtî değirmene vâzı‘u’l-yed olan Lefter v. Nikola nâm zimmî muvâcehesinde üzerine takrîr-i da‘vâ edip merhûm-ı merkūm Ferhad Paşa vakfından olup kasaba-i mezbûreye tâbi‘ Bayezid nâm karyede vâki‘ lede’l-ahâlî ve’l-cîrân ma‘lûmü’l-hudûd iki göz değirmenin icâre-i mu‘accele ve müeccele ile mutasarrıf olan mezkûr Lefter dünkü gün zikr olunan değirmenin hakk-ı tasarrufunu seksen bin akçe bedel mukābelesinde mütevellî-i mersûm Abdülbâkī Ağa’nın izin ve ma‘rifetiyle müvekkilem mezbûre için bana ferâğ u tefvîz, ben dahi vekâleten tefevvüz ve kabûl edip bedel-i merkūm seksen bin akçeyi tamâmen mezbûr Lefter’e vekâletim hasebiyle def‘ ü teslîm ol dahi ahz u kabz etmişken zikr olunan değirmeni teslîmde te‘allül eder suâl olunup teslîme tenbîh olunmak matlûbumdur dedikde gıbbe’s-suâl ve akībe’l-inkâr vekîl-i mezbûrdan müdde‘âsını mübeyyine beyyine taleb olundukda udûl-i müslimînden umdetü’l-a‘yân Kemalzâde Mehmed Ağa b. Mehmed ve fahrü’l-akrân Ahmed Ağa b. Yahya nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ ücreteyn-i ma‘hûdeteyni değirmen-i mesfûrun mutasarrıfı olan işbu Lefter bizim huzûrumuzda zikr olunan değirmenin hakk-ı tasarrufunu seksen bin akçe bedel mukābelesinde mütevellî-i merkūm Abdülbâkī Ağa’nın izin ve ma‘rifetiyle dünkü gün müvekkilemiz mezbûre Ayşe için vekîl-i mezbûr Hasan Efendi’ye ferâğ u tefvîz, ol dahi vekâleten tefevvüz ve kabûl eyledikden sonra bedel-i merkūm seksen bin akçeyi mezbûr Lefter’e tamâmen def‘ u teslîm edip merkūm Lefter dahi ahz u kabz eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Hurrire fî gurreti Cemâziyelâhir li sene erba‘a ve seb‘în ve elf. Şuhûdü’l-hâl: Umdetü’l-müderrisîni’l-kirâm Ömer Efendi, Abdi Efendi b. Yahya, el-Hâc Mustafa b. Abdullah, Mustafa b. İsâ, el-Hâc Ahmed b. Mahmud, Abdi Çelebi b. Hüseyin ve gayruhüm.