İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 888 Hüküm no: 1211 Orijinal metin no: [130a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mahmud ile Kerime ve Şerife’nin babalarından kalan menzili Seyyid Osman Efendi b. Saçlı Emir’e sattıkları Fi’l-asl medîne-i Kayseriye sâkinlerinden olup bundan akdem mahmiye-i İstanbul’da Karagümrük kurbunda Kethüdâ Kadın mahallesinde sâkin iken fevt olan Ahmed b. ( ) nâm kimesnenin verâseti, sulbî kebîr oğlu Seyyid Mahmud ile sulbiye kebîre kızları Kerime ve Şerife nâm hâtunlara münhasıra olduğu şer‘an mütehakkik oldukdan sonra meclis-i şer‘-i hatîrde merkūm Seyyid Mahmud asâleten ve mezbûr Kerime ve Şerife’nin ammileri ve taraflarından husûs-ı âtîye vekîlleri olup vekâleten mezbûretân Kerime ve Şerife’nin mehâriminden olup zâtları ma‘rifet-i şer‘iyye ile ârifân olan Durmuş Beşe b. Sefer ve Yusuf Beşe b. Hızır nâm kimesneler şehâdetleriyle şer‘an sâbite olan Ali bin Osman nâm kimesne vekâleten Seyyid Osman Efendi b. Saçlı Emir nâm kimesne mahzarında ikrâr ve takrîr-i kelâm edip müteveffâ-yı mezbûrun terekesinden olup medîne-i mezbûrede Hasanbeyli mahallesinde vâki‘ bir tarafı Ramazan oğlu Hasan mülkü ve etrâf-ı selâsesi tarîk-i âm ile mahdûd bir sofa ve bir matbahhâne ve muhavvatayı müştemil mülk menzili merkūm Seyyid Osman Efendi’ye kırk esedî guruşa bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semeni olan meblağ-ı mezbûr kırk esedî guruşu merkūm Seyyid Osman Efendi yedinden asâleten ve vekâleten bi’t-tamâm alıp kabz edip menzil-i mahdûd-ı mezkûru mahallinde zabt u tasarrufa müşterî-i merkūm Seyyid Osman Efendi[’yi] taslît eyledik dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’t-târihi’l-mezbûr li’s-seneti’l-merkūme Şuhûdü’l-hâl: Hasan b. Ali, Murtaza b. Abdullah, Şaban Bey b. Hasan, Yusuf b. Abdullah, Abdi Çelebi b. Hüseyin.