İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 888 Hüküm no: 1212 Orijinal metin no: [130a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdünnebi’nin malının üçte birini vasiyet, zarûri harcamalarının dışındaki kısmını da vakfederek Sofya eski kadısı Hasan Efendi b. Süleyman’ı hem vasî hem de mütevellî tayin ettiği Husûs-ı âti’l-beyânın mahallinde tahrîri için bi’l-iltimâs bu fakīr mahmiye-i İstanbul’da Çıkrıkçı Kemal mahallesinde umdetü’l-muhadderâti’l-mükerreme Fâtıma Hâtun bt. Abdünnebî nâm hâtun sâkine olduğu menzile varıp zeyl-i rakīmde isimleri mastûr olan müslimîn huzûrlarında akd-i meclis-i şer‘-i hatîr olundukda mezkûre Fâtıma Hâtun meclis-i ma‘kūd-ı mezbûrda işbu kitâb-ı sıhhat-nisâb yed-i kerîmelerine vusûl ile şeref-yâb olup sâbıkan Sofya kadısı olan umdetü’l-ulemâ’i’l-izâm kıdvetü’l-fuzalâ’i’l-kirâm Hasan Efendi b. Süleyman mahzarında takrîr-i kelâm edip cemî‘ eşyâ-i memlûkem on müsta‘mel atlas kaftan ve iki müsta‘mel atlas zıbın ve tahmînen otuz miskāl inci ve beş kıt‘a inci çapraz ve altı kıt‘a inci saçlık ve bir inci enselik ve incili on ayak altın saç bağı ve köhne yirmi beş Bursa yasdığı ve üç müsta‘mel orta keçesi ve bir kaliçe ve üç müsta‘mel Acem keçesi ve altı kumaş yorgan ve ikisi kebîr biri sagīr üç tencere ve bir kebîr sini ve iki döşek ve on sahan ve bir güğüm ve bir leğen ma‘a ibrik ve bir köhne kürk ve bir sîm ön kuşak olup bu eşyâdan gayrı ism-i mal ıtlâk olunur bir şeyim ve bir habbem yoktur, bi emrillâhi te‘âlâ vefât eylediğimde eşyâ-i mezkûremin mecmû‘u semen-i misilleri ile bey‘ olunup esmân-ı müctemi‘adan yirmi dört bin akçe ifrâz olunup dört bin akçesini iskāt-ı salâtıma ve mâ‘adâdan techîz ve tekfîn ve levâzım-ı defin ve eyyâm-ı mu‘tâdede tabh-ı ta‘âma harc u sarf olunup bâkī kalan fazla vakıf ve haps olup nukūd-ı mevkūfa zam u ilhâk olunup ba‘de’l-i‘mâl nemâsı tahrîr ettirdiğim vakfiyede mastûr olan şartımın vezâyifine verilip yine mûmâ-ileyh Hasan Efendi mütevellî ola deyû vasiyyet ve bu vesâyâmı tenfîze müşârün-ileyh Hasan Efendi’yi vasiyy-i muhtâr nasb ve ta‘yîn eyledim dedikde mezbûr Hasan Efendi dahi vesâyet-i mezbûreyi kabûl ve merâsimini edâya müte‘ahhid olmağın mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: A‘lemü’l-ulemâ’i’l-izâm Mesud Efendi b. ( ) el-müvellâ’l-merhûm, Kıdvetü’l-ulemâ’i’l-muhakkikīn Abdullah Efendi, Umdetü’l-ulemâ’i’l-kirâm İbrahim Efendi b. Mehmed, Umdetü’l-müderrisîni’l-kirâm Mustafa Efendi, Fahrü’l-müderrisîni’l-kirâm Mehmed Efendi b. Abdülvehhab, Umdetü’l-kuzât es-Seyyid Mehmed Efendi, mefharü’l-kuzât Ahmed Efendi b. İlmî, mefharü’l-kuzât Hasan Efendi b. el-Hâc Veli ve gayruhüm.