İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 890 Hüküm no: 1214 Orijinal metin no: [130b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni Tacir Mirza v. Karabet’in Karsihan v. Yar Acem’de alacağı olduğu Mahmiye-i İstanbul’da Vâlide Hânı’nda sâkin tüccârdan işbu hâmilü’s-sifr Mirza v. Karabet nâm Ermeni mahfil-i kazâda, Karsihan v. Yar Acem nâm Ermeni muvâcehesinde üzerine takrîr-i da‘vâ edip şerîkim hâzır bi’l-meclis Zankül v. Ağagölya yediyle müşterâ ve makbûz Acem metâ‘ı bahâsından mezkûr Karsihan zimmetinde iki yüz elli kıt‘a esedî guruş hakkım vardır, hâlâ taleb ederiz suâl olunsun dedikde gıbbe’s-suâl mezbûr Karsihan cevâbında fi’l-vâki‘ müdde‘î-i mezbûra vech-i muharrer üzre iki yüz elli esedî guruş deynim olup lâkin târih-i kitâbdan elli ay mukaddem müdde‘î-i mezbûra bey‘ ü teslîm eylediğim yüz kırk elmas ve yüz kırk yakut taşlı altın ile murassa‘ on dört pafta kuşak bahâsından müdde‘î-i mezkûr zimmetinde hakkım olan beş bin guruşun iki yüz elli guruşuna takās eyledim deyû def‘le mukābele edicek gıbbe’l-istintâk ve akībe’l-inkâr mezbûr Karsihan’dan def‘-i mezbûrunu mübeyyine beyyine taleb olundukda beyyinem yoktur deyip mezkûr Mirza’ya yemîn dahi vermemeğin meblağ-ı mezkûr iki yüz elli esedî guruşu edâya tenbîh birle mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: El-Hâc Ahmed b. Mahmud, Abdi Çelebi b. Hasan, Şükrullah b. Mustafa, Veli Çelebi b. Mahmud ve gayruhüm.