İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 891 Hüküm no: 1215 Orijinal metin no: [130b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâbiha bt. Abdullah’ın vakf ettiği menzilinin diğer mülk menziliyle değiştirilmesine izin verildiği Mahmiye-i Kostantıniyye’de Debbâğzâde mahallesinde vâki‘ bir tarafı Nakkāş Mehmed Çelebi tasarrufunda olan menzile ve iki tarafı kayyım Mustafa mülküne ve bir tarafı tarîk-i âma müntehî iki bâb tahtânî oda ve bir bâb fevkānî oda ve tahtânî iki sofa ve bir su kuyusunu ve havluyu müştemil olup Sâbiha Hâtun bt. Abdullah nâm sâhibü’l-hayrın vakf-ı lâzıme ile vakf eylediği menzile hâlâ mütevellî olan Mehmed Beşe b. Musa ile mahmiye-i mezbûrede Haydarhâne mahallesinde vâki‘ bir tarafdan umdetü’l-kuzât sâbıkan Rumeli kazaskeri tezkirecisi Ali Efendi menziline ve bir tarafdan tarîk-i âm ve bir tarafdan Hamîde Hâtun mülküne ve bir tarafdan Kâtib Ahmed Çelebi tasarrufunda olan arsaya müntehî tahtânî üç oda ve bir mahzen ve bir matbah ve bir kenîf ve bir su kuyusunu ve havluyu müştemil mülk menzil sâhibesi mezbûre Sâbiha Hâtun meclis-i şer‘a gelip istibdâl murâd ettiklerinde, savb-ı şer‘-i mutahhardan Mevlânâ mu‘îd Mustafa Efendi irsâl olunup ol dahi Hâssa mi‘mârlardan üstâd el-Hâc Hasan Halîfe b. Ömer ve zeyl-i sahîfede isimleri mastûr olan müslimîn ile ol menzil-i mahdûd-ı mevkūfun üzerine varıp akd-i meclis-i şer‘-i şerîf ettikde, mi‘mâr-ı mezbûr mezkûrlar mahzarlarında menzil-i mevkūf-ı mezkûru mesâha ve takvîm edip tûlen ve arzen bi hesâb-ı şatrancî yüz seksen üç zirâ‘ binâ ma‘a zemîninin her zirâ‘ını yüz ellişer akçeden yirmi yedi bin dört yüz elli akçe ve hesâb-ı mezkûr üzre iki yüz otuz dört zirâ‘ arsa-i mevkūfenin her zirâ‘ı otuzar akçeden yedi bin iki yüz doksan akçe ve bir su kuyusunu bin beş yüz akçe ve bir köhne tahtapûş dört yüz akçe ve otuz dokuz zirâ‘ tahta perde zirâ‘ı on beş akçeden beş yüz seksen beş akçe min haysi’l-mecmû‘ otuz yedi bin iki yüz yirmi beş akçe ve ve ecr-i misli beher yevm dörder akçe ve sâniyyen arsa-i memlûke-i [131a] mahdûdenin üzerine varıp mesâha ve takvîm ettikde, tûlen ve arzen bi hesâb-ı mezbûr iki yüz otuz iki buçuk zirâ‘-ı cedîd binâlı arsanın her zirâ‘ı iki şer‘ yüz ellişer akçeden elli sekiz bin yüz yirmi beş akçe ve hesâb-ı mezkûr üzre beş yüz kırk sekiz buçuk zirâ‘ arsa-i memlûkenin her zirâ‘ı kırkar akçeden yirmi bir bin dokuz yüz yirmi akçe bir su kuyusu ağırlığıyla üç bin ve bir demir kapaklı mahzen altı bin akçe min haysi’l-mecmû‘ seksen dokuz bin kırk beş akçe ve ecr-i misli beher yevm sekizer akçe ve arsa-i memlûke-i mahdûde-i mu‘ayyene asl ve rub‘ ve nef‘ ve kıymet cihetinden arsa-i mevkūfe-i mahdûdeden evfer olduğuna haber verdiğini Mevlânâ-yı mezbûr mahallinde tahrîr ve ba‘dehû ma‘an ba‘s olunan Abdurrahman Beşe ve Hasan ile meclis-i şer‘a gelip vech-i meşrûh üzre istibdâl min külli’l-vücûh cânib-i vakfa evlâ ve ahrâ olduğunu ihbâr edip bi emri âlî muvakki‘-i sadr-ı kitâb olan âlim, âmil, fâzıl ve kâmil-i âdil-i bî-mu‘âdil Efendi hazretleri menzil-i memlûk mârrü’z-zikr menzil-i mevkūf ile sıhhat-i istibdâline izin verip anlar dahi mübâdele edip vech-i şer‘î üzre emr-i istibdâl tamâm oldukdan sonra mezbûre Sâbiha Hâtun takrîr-i kelâm edip sâbıkan vakıf olan menzil benim mülküm olmuşken mütevellî-i mezbûr yine vakıf olmak üzre ol menzile vaz‘-ı yed edip tasarrufuma mâni‘ olur, suâl olunup kasr-ı yedine tenbîh olunması matlûbumdur dedikde gıbbe’s-suâl mütevellî-i mezkûr cevâbında vâkıfe-i mezbûre istibdâli şart etmekde istibdâl sahîh değildir deyû menzil-i mezbûru yine ke’l-evvel zabt murâdımdır dedikde mezbûre Sâbiha Hâtun i‘âde-i kelâm edip fi’l-vâki‘ istibdâl şart olunmadıkça sahîh olmaz, lâkin hâkimü’ş-şer‘i’ş-şerîf bâ emr-i âlî min ciheti’r-rey‘ ve’t-tenmiye ekser ve evfer olan bedel ile istibdâli tecvîz edicek nakz ve nakzına mecâl muhâldir deyû istibdâl-i mezkûrun sıhhatine hüküm taleb ettikde, hâkim-i mûmâ-ileyh -esbağallâhu ni‘amehû aleyh- hazretleri istibdâl-i mezkûrun sıhhatine ve bedel verilen menzil-i memlûkün vakfiyetine ve sâbıkan vakıf olan menzilin mülkiyyetine âlimen bi’l-hilâfı alâ re’yi men yerâhü min eimmeti’l-müctehidîn -rıdvânullâhi te‘âlâ aleyhim ecma‘în- hükm-i sahîh-i şer‘î ve kazâ-i sarîh-i mer‘î edip mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: Es-Seyyid Mehmed Efendi b. Mustafa Efendi, es-Seyyid Mehmed Çelebi b. Abdullah, Ömer Efendi b. Osman, Hacı Ali b. Abdullah, Derviş Çelebi b. Mehmed, Cafer Çavuş b. ( ) ve gayruhüm.