İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 894 Hüküm no: 1217 Orijinal metin no: [131b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Hacı Piyâle’nin kocası Mahmud Çelebi b. Ebubekir’den boşandığı Husûs-ı âti’l-beyânı mahallinde tahrîr için gıbbe iltimâs kıbel-i şer‘-i mutahhardan Mevlânâ Mehmed Efendi irsâl olunup ol dahi mahmiye-i İstanbul’da Debbâğzâde mahallesinde Sâliha bt. el-Hâc Piyâle nâm hâtunun sâkine olduğu menziline varıp zeyl-i rakīmde muharrerü’l-esâmî olan müslimîn huzûrlarında akd-i meclis-i şerîf eyledikde zâtı ma‘rifet-i şer‘iyye ile ârifân olan Mustafa b. Mehmed nâm kimesne ile yine mahalle-i mezbûre sâkinelerinden Ayşe bt. Ahmed ve Nazlı bt. Abdullah nâm hâtunlar ta‘rîfleri ile mu‘arrefe olan merkūme Sâliha meclis-i ma‘kūd-ı mezbûrda, işbu bâ‘isü’l-kitâb zevci Mahmud Çelebi b. Ebûbekir mahzarında bi tav‘ihâ ikrâr ve takrîr-i kelâm edip zevcim mezbûr Mahmud Çelebi zimmetinde mütekarrir ve ma‘kūdun-aleyh olan yedi bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre mezbûr Mahmud Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete ve gayra müte‘allika âmme-i de‘âvîden her birimiz âharın zimmetini ibrâ-ı âm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Nasûh b. Yusuf ve Veli b. Mahmud ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fî Cemâziyelevvel [li sene] erba‘a ve seb‘în ve elf. Şuhûdü’l-hâl: Mustafa Efendi b. Mehmed, Ahmed Beşe er-Râcil, Ali Beşe b. Ahmed, Nasûh b. Yusuf, Veli b. Mahmud.