İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 895 Hüküm no: 1220 Orijinal metin no: [132a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeniye Trafende bt. Melko’nun kendisi ve vasîsi olduğu oğlu Arakir adına kocasını öldüren Horasancı David v. Ağazar ile sulh olduğu Mahmiye-i İstanbul’da Çoban Çavuş mahallesinde sâkin iken mecrûhan mürd olan Dador v. Nerses nâm Ermeni’nin verâseti, zevce-i metrûkesi Trafende bt. Melko nâm Ermeniye’ye ve sulbî oğlu Arakir nâm sagīre münhasıra olduğu şer‘an mütehakkik oldukdan sonra mezkûre tarafından kendi nefsinden asîl ve sagīr-i mezbûr Arakir’in kıbel-i şer‘den mansûbe vasîsi olmağla vesâyeten meclis-i şer‘-i hatîrde horasancı tâifesinden işbu hâmilü’s-sifr David v. Ağazar nâm Ermeni muvâcehesinde ikrâr ve i‘tirâf edip târih-i kitâb senesi şehr-i Rebî‘ulevveli’nin on dokuzuncu isneyn gecesi vakt-i işâda mezkûr David zevcim mesfûr Dador’u bi gayri hakkın amden sağ kulağı tozuna taş ile muhkem darb ve cerh edip ol hînde darb ve cerh-i mezkûrdan mürd olmağla mûceb-i şer‘îsi[ni] mezbûr Davi’den taleb ve da‘vâ eylediğimde cevâbında husûs-ı mezkûru bi’l-külliye inkâr etmeğin müdde‘âmı vech-i muharrer üzre isbâta bu âna değin kudretim olmayıp bi’l-asâle istihlâf eylediğimde meclis-i şer‘de yemîn etmek sadedinde iken beynimizde münâza‘ât-ı kesîre ve muhâsamât-ı şedîde vukū‘undan sonra mâbeyne muslihûn tavassut edip da‘vâ-yı meşrûhadan otuz bin akçe üzerine inşâ-i akd-i sulh eylediklerinde mezkûr David yemîn ettiği takdîrce sagīr-i mezbûr birisine âid ve râci‘ olmayıp sulh her vechile sagīr hakkında evlâ ve enfa‘ olmağla sulh-ı mezbûru kabûl ve bedel-i sulh olan meblağ-ı merkūm otuz bin akçeyi meclis-i şer‘de mezkûr David yedinden asâleten ve vesâyeten tamâmen ahz u kabz eyledim ba‘de’l-yevm husûs-ı mezbûra müte‘allik olan cemî‘ de‘âvî ve mütâlebâtdan mezkûru bi’l-asâle ibrâ eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Cemâziyelâhir li sene erba‘a ve seb‘în ve elf. Şuhûdü’l-hâl: Ahmed Ağa b. Mustafa, Abdurrahman Beşe b. Bakī, Nasûh Beşe b. Yusuf, Mahmud Çelebi b. İsmail, Hasan Beşe b. Abdullah, Osman b. Ali ve gayruhüm.