İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 896 Hüküm no: 1221 Orijinal metin no: [132a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kazancı Hacı Mehmed b. Muslu’nun Manol v. Kostantin’de alacağı olduğu Kazgancı tâifesinden işbu râfi‘ü’l-kitâb el-Hâc Mehmed b. Muslu mahfil-i kazâda Manol v. Kostantin nâm zimmî muvâcehesinde üzerine takrîr-i da‘vâ edip mezbûr Manol zimmetinde vezni beynimizde ilm-i şer‘î ile ma‘lûm yedimden müşterâ ve makbûz bakır bahâsından on bir bin beş yüz elli akçe hakkım olup meblağ-ı mezbûrun bin beş yüz akçesini ahz u kabz edip meblağ-ı bâkī on bin elli akçeyi taleb ederiz suâl olunsun dedikde gıbbe’s-suâl mezkûr Manol cevâbında kaziyye vech-i muharrer üzre olup lâkin kabzına i‘tirâf eylediği meblağ-ı mezbûr bin beş yüz akçeden mâ‘adâ bin akçe dahi def‘ ü teslîm edip ancak dokuz bin elli akçe deynim bâkī kalmışdır deyû bin akçeyi def‘le mukābele ve dokuz bin elli akçemi ikrâr edicek gıbbe’l-istintâk ve’l-inkâr mezbûr Manol’den def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ kaziyye i‘tirâf eylediği bin beş yüz akçeden ziyâde bin akçe dahi mezkûr Manol’den ahz u kabz etmediğine müdde‘î-i mezbûr el-Hâc Mehmed’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ ettikden sonra mûcebince mezbûr on bin elli akçeyi müdde‘î-i mezkûre edâya merkūm Manol’e tenbîh olundukdan sonra mezkûr el-Hâc Mehmed meclis-i şer‘de mezkûr Manol muvâcehesinde ikrâr ve i‘tirâf edip bâlâda edâsına hükm-i şer‘î lâhık olan meblağ-ı mezbûr on bin elli akçeyi meclis-i şer‘de mezkûr Manol yedinden tamâmen ahz u kabz eyledim, husûs-ı mezbûra ve târih-i kitâba gelince beynimizde cereyân eden mu‘âmelât-ı şettâya müte‘allika olan cemî‘ de‘âvî ve mütâlebât ve eymân ve muhâsamâtdan mezbûr Manol’ü ibrâ-ı âm ile ibrâ eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Sefer Çavuş b. Muharrem el-Mübâşir, es-Seyyid Ahmed b. es-Seyyid Murtaza, el-Hâc Ahmed b. Mahmud, Abdi Çelebi b. Hüseyin ve gayruhüm.