İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 897 Hüküm no: 1222 Orijinal metin no: [132a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mustafa’nın menzilini Hacı Mustafa b. Beşir’e sattığı Mahmiye-i İstanbul’da Hoca Kasım mahallesinde sâkin Ahmed Ağa b. Mustafa tarafından bey‘-i âti’l-beyâna vekîl olup Mehmed Çelebi b. Muslu ve İsmail b. Mehmed şehâdetleri ile şer‘an vekâleti sâbite olan Süleyman Ağa b. İbrahim meclis-i şer‘-i hatîrde işbu râfi‘ü’l-kitâb el-Hâc Mustafa b. Beşir mahzarında bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafı mahalle-i mezbûrenin imâmına meşrût olan menzile ve bir tarafı Mehmed Bey b. Abdullah menziline ve bir tarafı mersûm el-Hâc Mustafa’nın menziline ve bir tarafı tarîk-i hâs ile mahdûd iki beyt-i süflî ve bir sofa ve bi’r-i mâ-i müşterek ve cüneyne ve kenîf ve zât-ı eşcârı müştemil olan müvekkilim mezbûr Ahmed Ağa’nın mülk menzilini merkūm el-Hâc Mustafa’ya yüz kâmil esedî guruşa bey‘-i bâtt-ı sahîh-i şer‘î ile bey‘ ü teslîm edip ol dahi iştirâ ve kabûl ve tesellüm eyledikden sonra semeni olan meblağ-ı merkūm yüz esedî guruşu müvekkilim merkūm Ahmed Ağa mezbûr el-Hâc Mustafa yedinden tamâmen ahz u kabz eyledi ba‘de’l-yevm menzil-i mahdûd-ı mezkûr mezbûr el-Hâc Mustafa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelâhir sene erba‘a ve seb‘în ve elf. Şuhûdü’l-hâl: Es-Seyyid Ömer Çelebi b. Abdurrahman, Mustafa Beşe er-Râcil, Mehmed b. Abbas, Mehmed b. Haydar, Ali Çelebi b. Ahmed, Mahmud Beşe er-Râcil, İsmail b. Abdullah, Yusuf Çelebi b. Mehmed, el-Hâc İbrahim b. Abdullah ve gayruhüm.