İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 905 Hüküm no: 1233 Orijinal metin no: [134a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Celeb Mehmed b. Abdurrahman’ın menzilini oğlu Ali Beşe’ye sattığı Mahmiye-i İstanbul’da Sultan Selim Hân câmi‘-i şerîfi kurbunda Çukurbostan mahallesinde sâkin Celeb Mehmed b. Abdurrahman nâm kimesne meclis-i şer‘de sulbî oğlu işbu bâ‘isü’l-kitâb Ali Beşe nâm râcil mahzarında bi’t-tav‘i’s-sâf ikrâr ve i‘tirâf edip senede merhûm Şeyh Yavsi zâviyesi vakfına yüz akçe mukāta‘a-ı kadîmesi olup mahalle-i mezbûrede vâki‘ bir tarafı papuççu Hasan menziline ve bir tarafı Ebûbekir menzili ve bir tarafı bostana ve bir tarafı tarîk-i hâssa müntehî bir bâb fevkānî ve bir bâb tahtânî odaları ve tahtapûş zât-ı eşcâr-ı müsmire bahçe ve su kuyusunu ve kenîfi müştemil mülk menzilin nısf-ı şâyi‘ini oğlum mezbûr Ali Beşe’ye on bin akçeye tarafeynden îcâb ve kabûlü hâvî ve mevâni‘den ârî bey‘-i bâtt-ı sahîh-i şer‘î ile bey‘ ü teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûru işbu hâzıre bi’l-meclis zevcem Fâtıma Hâtun’a menzil bahâsından olan on bin akçe deynim için mezbûr Ali Beşe’den havâle edip mezbûre Fâtıma’dan ve Ali Beşe’den her birimiz havâleyi kabûl etmişlerdir ba‘de’l-yevm menzil-i mezbûr mezbûr Ali Beşe’nin mülkü olup menzil semeninden mezbûr Ali Beşe’de bir habbe hakkım ve alacağım kalmamışdır dedikde gıbbe’t-tesâdıki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelâhir li sene erba‘a ve seb‘în ve elf. Şuhûdü’l-hâl: Ahmed Çelebi b. Süleyman el-mukayyid, Mehmed Beşe b. ( ), Mahmud Beşe b. Mehmed, Abdi Çelebi b. Hüseyin ve gayruhüm.