İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 906 Hüküm no: 1235 Orijinal metin no: [134b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köle olduğu iddia edilen Rus asıllı Hasan’ın hür olduğunun tescili İşbu açık kaşlı sarı elâ gözlü orta boylu Rusiyyü’l-asl Hasan b. Abdullah nâm şâbb-ı emred mahfil-i kazâda kendiye rakīk olmak zu‘muyla vâzı‘u’l-yed olan el-Hâc Pîr Mehmed b. Hamza mahzarında üzerine takrîr-i da‘vâ edip ben dergâh-ı âlî yeniçerilerinin yirmi ikinci cemâ‘atine mahsûs odada odabaşı olan Eyüb Beşe’nin abd-i memlûkü olup hâcc-ı şerîfe azîmet eyledikde beni tahrîr ve i‘tâk ve ahrâr-ı asliyyîne ilhâk eyledikden sonra tarîk-i hâcda vefât etmekle li ebeveyn ammi oğlu ve bi’l-inhisâr vârisi olan Süleyman Beşe beni müteveffâ-yı mezbûrun rıkkıyyeti olmak üzre zabt ve dokuz bin altı yüz akçe semen-i makbûza mezkûr el-Hâc Pîr Mehmed’e bey‘ ve teslîm eylemiş, suâl olunup kasr-ı yed ve sebîlim tahliyye olunmak matlûbumdur dedikde gıbbe’s-suâl mezbûr Pîr Mehmed cevâbında müdde‘î-i mezkûr Hasan’ı mezkûr Süleyman Beşe’den meblağ-ı mezbûr dokuz bin altı yüz akçe semen-i makbûza vech-i muharrer üzre iştirâ ve kabz edip mülk-i müşterâm olmak üzre vaz‘-ı yed ederiz deyû vech-i meşrûh üzre tahrîr ve i‘tâkı inkâr edicek müdde‘î-i mezkûr Hasan’dan müdde‘âsını mübeyyine beyyine taleb olundukda udûl-i müslimînden olup zikr olunan oda ahâlîsinden Osman Beşe b. Abdünnebî ve Hasan Beşe b. Mehmed ve İbrahim Çelebi b. el-Hâc Rıdvan ve Mehmed Beşe b. Mustafa ve Ali Beşe b. Derviş nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezbûr Eyüb Odabaşı hâcc-ı şerîfe azîmet eylediğinde abd-ı memlûkü olan müdde‘î-i mezkûr Hasan’ı mülkünde olduğu hâlde bizim huzûrumuzda tahrîr ve i‘tâk ve ahrâr-ı asliyyîne ilhâk edip ol vechile mezkûr Hasan sâir ahrâr-ı asliyyîn gibi hür olduğuna şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Tahrîren fi’l-yevmi’s-sânî aşer min Cemâziyelâhir li sene erba‘a ve seb‘în ve elf. Şuhûdü’l-hâl: Mustafa b. Mehmed, İbrahim Beşe b. Mehmed, Duran b. Ali, Kadri Beşe b. ( ), Abdi Çelebi b. Hüseyin, Hacı Ahmed b. Mahmud ve gayruhüm.