İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 907 Hüküm no: 1236 Orijinal metin no: [134b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Asvador v. Necnek’in bağını Toros v. Kesper’e sattığı Medîne-i Galata’ya tâbi‘ kasaba-i Kasımpaşa mahallâtından Kulaksız mahallesi sükkânından Asvador v. Necnek nâm zimmî meclis-i şer‘-i hatîr-i lâzımü’t-tevkîrde, ekmekçi tâifesinden işbu hâmilü’s-sifr Toros v. Kesper nâm zimmî muvâcehesinde ikrâr ve takrîr-i kelâm edip vilâyet-i Anadolu’da Eğin kazâsı müzâfâtından Nurun? nâm karyede vâki‘ bir tarafı İskender Beşe bağı ve bir tarafı Sahak nâm zimmî bağı ve bir tarafı Gönen nâm zimmî tarlası ve bir tarafı Kelebek nâm zimmî harmanı ile mahdûd tahmînen bir ırgadlık bir kıt‘a mülk bağımı ve yine karye-i merkūmede vâki‘ bir tarafı Kesper nâm zimmî bağı ve bir tarafı Kirakos nâm zimmî tarlası ve bir tarafı su harkı ve bir tarafı müşterî-i merkūm Toros bağı ile mahdûd kezâlik tahmînen bir ırgadlık bir kıt‘a mülk bağımı, mesfûr Toros’a beş bin beş yüz nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semenleri olan meblağ-ı merkūm beş bin beş yüz akçeyi müşterî-i merkūm Toros yedinden bi’t-tamâm ve’l-kemâl ahz u kabz eyleyip mahallerinde zabt u tasarrufa mezbûr Toros’u taslît eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Hurrire fi’l-yevmi’l-âşir min Cemâziyelâhir li sene erba‘a ve seb‘în ve elf. Şuhûdü’l-hâl: Mehmed Çelebi b. Abdullah, Abdi Çelebi b. Hüseyin, Şükrullah b. Resûl, Baba Resûl b. Mustafa ve gayruhüm.