İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 908 Hüküm no: 1238 Orijinal metin no: [134b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müstakime bt. Abdullah’ın kocası Abdurrahman b. Abdullah’dan muhâlaa yoluyla boşandığı Mahmiye-i İstanbul’da Bayezid Ağa mahallesi sâkinelerinden Müstakīme bt. Abdullah nâm hâtun meclis-i şer‘-i hatîrde zevc-i muhâlı‘ı işbu bâ‘isü’l-kitâb Abdurrahman b. Abdullah mahzarında ikrâr ve takrîr-i kelâm edip zevcim mezbûr Abdurrahman zimmetinde mütekarrir ve ma‘kūdun-aleyh olan iki bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre ve mezkûrun zimmetinde cihet-i karzdan bin akçe ile iki zolota hakkımdan fâriğa olup mezbûre bedel-i hul‘ olmak üzre merkūm Abdurrahman ile muhâla‘a-i sahîh-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete ve gayra müte‘allika âmme-i de‘âvîden her birimiz âharın zimmetini ibrâ-i âm ile ibrâ eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Cemâziyelâhir li sene 1074. Şuhûdü’l-hâl: Es-Seyyid Mehmed b. es-Seyyid Yusuf, Hasan Çelebi b. Ahmed el-Müezzin, Şaban Beşe b. Mehmed, el-Hâc Ahmed b. Mahmud, Abdi Çelebi b. Hüseyin, Şükrullah b. Mustafa, Resûl b. Rıdvan, Mehmed b. Ramazan.