İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 908 Hüküm no: 1239 Orijinal metin no: [135a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lal bt. Kirkor’un, ölen kocası Osaf v. Serkis’in mirasıyla ilgili olarak Savat Ermeni aleyhine açtığı davada haklı olduğu Mahmiye-i İstanbul’da Balat kurbunda sâkine Lal nâm nasrâniyyenin babası ve husûs-ı âti’z-zikre sâbitü’l-vekâle vekîli olan Kirkor v. Bogos nâm Ermeni meclis-i şer‘-i hatîrde Osaf v. Serkis nâm hâlikin li ebeveyn karındaşı olup verâseti olan Savat Ermeni muvâcehesinde bi’l-vekâle üzerine da‘vâ ve takrîr-i kelâm edip hâlik-i mezbûr hayâtında târih-i kitâbdan üç sene mukaddem kızım Lal’i tezvîc için tarafından karındaşı işbu mezbûr Savat Ermeni[’yi] tevkîl edip ol dahi ba‘de’l-kabûl vekâleten ben velâyeten kızım mezbûre Lal’i Balat kilisesinde papazlarımız yanında bir çift zümrüd küpe üzerine âyînimiz üzre tezvîc edip mezbûr Savat dahi bi’l-vekâle merkūm Osaf için tezevvüc ve kabûl edip yevm-i helâkine gelince menkûhası olup helâkinden sonra terekesinin rub‘u zevcesi mezbûre Lal ile selâse-i erbâ‘ı mezbûr Savat’a intikāl eylemişken mecmû‘-ı terekeye vaz‘-ı yed edip zevcesinin hissesini vermede imtinâ‘ eder suâl olunsun dedikde gıbbe’s-suâl mezbûr Savat merkūme Lal[’in] vech-i muharrer üzre hâlik-i mezbûrun menkûhası olduğunu münkir olıcak vekîl-i mezbûrdan müdde‘âsını mübeyyine beyyine taleb olundukda udûl-i nasârâdan Haçador Papas v. Bağdasar ve Murad v. Muse nâm Ermeniler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ hâlik-i mezbûr hayâtında mezbûre Lal’i tezevvüc için karındaşı merkūm Savat’ı tarafından tevkîl edip ol dahi ba‘de’t-tevkîl vekâleten mezbûr Kirkor velâyeten kızı mezbûr Lal’i zikr olunan kilisede bir çift zümrüd küpe üzerine âyînimiz üzre tezvîc edip mezbûr Savat dahi merkūm Osaf için tezevvüc ve kabûl eyledi. Mezbûr Lal mersûm Osaf Ermeni’nin yevm-i helâkine gelince menkûhası idi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle hâlik-i mezbûrun terekesinden hissesini def‘ ü teslîme mezbûr Savat Ermeni’ye tenbîh olunup mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ ve’l-ışrîn min Rebî‘ilevvel li sene erba‘a ve seb‘în ve elf. Şuhûdü’l-hâl: El-Hâc Ahmed b. Mahmud, Şükrullah b. Mustafa, Abdi Çelebi b. Hüseyin, Baba Resûl b. Rıdvan ve gayruhüm.