İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 909 Hüküm no: 1240 Orijinal metin no: [135a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi’nin menzilinin vârisleri tarafından Ahmed b. Mahmud’a satıldığı Mahmiye-i İstanbul’da Kariye câmi‘-i şerîfi kurbunda Ali Paşa-yı Atîk mahallesi sâkinlerinden iken bundan akdem fevt olan Mehmed Çelebi b. Süleyman’ın verâseti, zevce-i metrûke-i menkûhası Sâime bt. Abdullah ile sulbiye kebîre kızları Ayşe ve Fâtıma ve Neslihan nâm hâtunlara münhasıra olduğu şer‘an mütehakkik oldukdan sonra meclis-i şer‘-i hatîr-i lâzımü’t-tevkîrde, mezbûrât Sâime ve Ayşe ve Fâtıma asâleten ve merkūme Neslihan tarafından ikrâr-ı âtîye vekîl olup vekâleti zât-ı mezbûreyi ma‘rifet-i şer‘iyye ile ârifân olan udûl-i müslimînden Abdüllatif Efendi b. Mehmed ve Seyyid Hüseyin Çelebi b. es-Seyyid Mehmed şehâdetleri ile sâbite olan es-Seyyid Abdülfettah b. es-Seyyid Hasan vekâleten işbu sâhibü’l-kitâb Ahmed b. Mahmud nâm kimesne mahzarında ikrâr ve takrîr-i kelâm edip müteveffâ-yı merkūm Mehmed Çelebi’nin terekesinden olup bi hasebi’l-irsi’ş-şer‘î bize isâbet ve intikāl eden mahalle-i mezbûrede vâki‘ bir tarafı Balcı Mehmed Çelebi ve bir tarafı Fâtıma nâm hâtun mülkleri ve bir tarafı medrese ve bir tarafı tarîk-i âm ile mahdûd dâhiliyye ve hâriciyye iki fevkānî oda ve bir sofa ve bir dehliz ve bir tahtapûş ve iki tahtânî oda ve ahır ve Balcı Mehmed Çelebi ile müşterek su kuyusu ve zât-ı eşcâr-ı müsmire ve gayr-ı müsmire bahçeli ve kenîfi müştemil mülk menzili cemî‘ tevâbi‘ ve levâhıkı ve kâffe-i menâfi‘ ve merâfıkı ile merkūm Ahmed’e kırk dört bin râyic fi’l-vakt akçeye bey‘-i bâtt-ı sahîh-i şer‘î ile bey‘ ü teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr kırk dört bin akçeyi bi’t-tamâm yedinden ahz u kabz eyledik ba‘de’l-yevm menzil-i mahdûd-ı mezkûr müşterî-i merkūm Ahmed’in mülk-i müşterâsı[dır], keyfe mâ yeşâ’ ve yahtâr mutasarrıf olsun dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Cemâziyelâhir li sene erba‘a ve seb‘în ve elf. Şuhûdü’l-hâl: Mustafa Efendi b. Durak, Mustafa b. Ahmed el-Müezzin, Hasan b. Ahmed el-Müezzin, Receb b. İbrahim el-Müezzin, İbrahim b. İbrahim, Mehmed b. Mustafa düğmeci, Balcı Mehmed Çelebi, Abdi b. Hüseyin, Veli b. Mahmud.