İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 910 Hüküm no: 1241 Orijinal metin no: [135b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Abdullah Efendi’nin oturduğu vakıf menzili kendi isteği ile Mehmed Efendi b. Hasan’a ferâğ ettiği Mahmiye-i İstanbul’da Ali Paşa-yı Atîk mahallesinde vâki‘ ( ) nâm sâhibü’l-hayrın vakf ve süknâsı ulemâdan bir recül-i sâliha şart eylediği, bir tarafdan Kâtib Mehmed Çelebi menzili ve bir tarafdan mahalle-i mezbûre imâmına meşrûta menzil ve bir tarafı Hasan Beşe menziline ve bir tarafı tarîk-i hâssa müntehî üç bâb tahtânî odaları ve eşcâr-ı müsmire ve gayr-ı müsmire bahçe ve su kuyusunu müştemil menzilin, tevcîh-i hâkimü’ş-şer‘le mutasarrıfı olan es-Seyyid Abdullah Efendi, menzil-i mezbûru kendi hüsn-i rızâsıyla ulemâdan olup meskene eşedd-i ihtiyâc ile muhtâc olan fahrü’l-müderrisîni’l-kirâm Mehmed Efendi b. Hasan’a ferâğ etmekle hâkim-i muvakki‘-i kitâb tûbâ-lehû ve hüsnü me’âb hazretleri dahi mezbûr Mehmed Efendi’ye tevcîh etmeğin mâ vaka‘a bi’t-taleb ketb olundu. Fi’l-yevmi’s-sâlis aşer min Cemâziyelâhir sene erba‘a ve seb‘în ve elf. Şuhûdü’l-hâl: Ahmed Efendi el-mukayyid, Ali Beşe b. ( ), Abdi Çelebi b. Hüseyin, Veli b. Mahmud, Nasûh Beşe Çukadar, Abdurrahman Beşe Çukadar ve gayruhüm.