İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 916 Hüküm no: 1252 Orijinal metin no: [136b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Sefer’in mülk menzil arsasını el-Hâc Zülfikār b. Mehmed’e sattığı Medîne-i Hazret-i Ebâ Eyyûb-i Ensârî mahallâtından İdris Köşkü kurbunda sâkin Mustafa Çelebi b. Sefer meclis-i şer‘-i hatîrde işbu bâ‘isü’l-kitâb el-Hâc Zülfikār b. Mehmed mahzarında ikrâr ve takrîr-i kelâm edip zikri âtî bey‘in sudûruna değin mülküm ve hakkım olup mahmiye-i İstanbul’da Arabacılar meydanı kurbunda vâki‘ bir tarafdan Navluncu Hasan Beşe mülkü ve iki tarafdan müşterî-i mezbûr el-Hâc Zülfikār mülkü ve bir tarafdan tarîk-i âm ile mahdûd olan muhterik mülk menzil arsasını, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr el-Hâc Zülfikār’a on dokuz bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz ve tesellüm eyledikden sonra semeni olan meblağ-ı merkūm on dokuz bin akçeyi müşterî-i mezbûr el-Hâc Zülfikār yedinden tamânen ahz u kabz eyledim ba‘de’l-yevm arsa-i mezbûre merkūm el-Hâc Zülfikār’ın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Cemâziyelâhir li sene erba‘a ve seb‘în ve elf. Şuhûdü’l-hâl: Ramazan Beşe b. ( ), Hüseyin Beşe b. Yazıcı, Mehmed Beşe el-Hayyât, Ahmed b. Murad, Ali b. Mustafa ve gayruhüm.