İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 916 Hüküm no: 1253 Orijinal metin no: [136b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arzuman Beşe b. Sevindik’in Tanaş v. Nikola’da vekâletden dolayı olan alacağını tahsil ettiği Medîne-i Hazret-i Eyyûb-ı Ensârî’de yoğurtçu tâifesinden Arzuman Beşe b. Sevindik nâm kimesne meclis-i şer‘de Tanaş v. Nikola nâm zimmî muvâcehesinde ikrâr ve takrîr-i kelâm edip merkūm Tanaş’ın karındaşı gāib ani’l-meclis Yorgi nâm zimmî zimmetinde cihet-i karz-ı şer‘den altı bin akçe hakkım olup meblağ-ı mezbûre merkūm Tanaş tarafından emr [ve] kabûlü hâviye kefâlet-i şer‘iyye ile kefîl olmağın iki bin akçeyi kefâleti hasebiyle mukaddemâ merkūm Tanaş yedinden ahz edip ve dört bin akçeyi zimmetinde kalmışdır hâlâ meblağ-ı bâkī dört bin akçemi dahi merkūm Tanaş yedinden tamâmen ahz u kabz edip zimmetinde bir akçe hakkım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelâhir sene 1074. Şuhûdü’l-hâl: Hüseyin b. Ebûbekir, Abdi Çelebi b. Hüseyin, el-Hâc Ahmed b. Mahmud, Şükrullah b. Mustafa ve gayruhüm.