İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 917 Hüküm no: 1254 Orijinal metin no: [137a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Resûl Çelebi b. Mahmud’un Veli Emir b. Yakub’da alacağı olduğu Mahmiye-i İstanbul’da Mustafa Paşa mahallesi mütemekkinlerinden bundan akdem fevt olan Resûl Çelebi b. Mahmud li ebeveyn karındaşı ve vârisi olan Mustafa b. Mahmud nâm kimesne meclis-i şer‘-i kavîm[de], mefharü’l-müderrisîn Veli Emir b. Yakub muvâcehesinde da‘vâ edip karındaşım müteveffâ-yı merkūmun verâseti li ebeveyn kız karındaşı Nâziki? nâm hâtunla ikimize münhasıra olmağla mefharü’l-müderrisîn Fazlullah Efendi b. el-Hâc Lütfullah nâm kimesne müteveffâ-yı merkūmun mâbeynimizde ilm-i şer‘î ile ma‘lûm at bahâsından kırk guruş hakkım vardır, [ba‘de’l-]fevt zimmetinde kaldı deyû benim üzerime verâsetim hasebiyle da‘vâ ve şuhûd-ı udûl ile isbât edip meblağ-ı mezbûr metrûkâtından edâya hükm olunmağla, ben dahi müteveffâ-yı merkūmun, merkūm Veli Efendi’de mâbeynlerinde ma‘rifet-i şer‘î ile ma‘rûf at bahâsından üç bin iki yüz kırk akçe hakkı vardır, deyn edâ olunmamağın alıverilip suâl olunması matlûbumdur demeğin, gıbbe’s-suâl merkūm Veli Efendi bi’l-muvâcehe üç bin akçe deynim vardır, gayrı bir akçe vereceğim yoktur dedikde meblağ-ı mezbûr üç bin akçenin edâsıyla ilzâm olunup mâ vaka‘a gıbbe’t-taleb kayd olundu. Tahrîren fî evâhir şehri Ramazâni’l-mübârek sene seb‘a ve ışrîn ve elf. Şuhûdü’l-hâl: Fahrü’l-emâsil Mehmed Çavuş, Sinan b. Abdullah, Sinan b. Eyüb, Eyüb b. Mustafa, Mustafa b. Mehmed kâtibü’l-hurûf ve gayruhüm.