İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 940 Hüküm no: 1279 Orijinal metin no: [143a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hasan’ın Ali Çelebi b. Mustafa’dan muhâlaa yoluyla boşandığı Mahmiye-i İstanbul’da Tavukpazarı kurbunda Ali Paşa mahallesinde sâkine Ayşe Hâtun bt. Hasan meclis-i şer‘-i hatîr-i lâzımü’t-tevkīrde zevci işbu râfi‘ü’l-kitâb fahrü’l-a‘yân Ali Çelebi b. Mustafa mahzarında ikrâr ve i‘tirâf edip zevcim merkūm Ali Çelebi zimmetinde mütekarrir ve ma‘kūdun-aleyh olan on akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre mezbûr Ali Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete ve târih-i kitâba gelince beynimizde cereyân eden ahz u i‘tâ ve karz ve vedî‘at ve şirket ve sâir hukūk-ı ma‘lûme ve mechûleye müte‘allika olan cemî‘-i de‘âvî ve mütâlebât ve eymân ve muhâsamâtdan her birimiz âharı ibrâ-i âmm-ı kātı‘ü’n-nizâ‘la ibrâ eyledi ba‘de’l-yevm her birimizin âhar kıbelinden vechen mine’l-vücûh ve sebebin mine’l-esbâb hak ve alâkası kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelâhir sene erba‘a ve seb‘în ve elf. Şuhûdü’l-hâl: Es-Seyyid Ahmed Çelebi b. es-Seyyid Mehmed, el-Hâc Hüseyin b. el-Hâc Ahmed, Mustafa Çelebi b. Ali Efendi, Hüseyin Çelebi b. Abdi, es-Seyyid Mehmed b. es-Seyyid Hasan, Ömer Bey b. İbrahim, Şaban b. Veli ve gayruhüm.