İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 943 Hüküm no: 1285 Orijinal metin no: [143b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Çelebi b. Hasan’ın Hasan Beşe b. el-Hâc Murad’daki alacağını tahsil ettiği Mahmiye-i İstanbul’da Sultân Selim Hân câmi‘-i şerîfi kurbunda sâkin Süleyman Çelebi b. Hasan meclis-i şer‘de işbu râfi‘ü’l-kitâb Hasan Beşe b. el-Hâc Murad mahzarında ikrâr ve takrîr-i kelâm edip mezbûr Hasan Beşe zimmetinde cihet-i deyn-i şer‘îden kırk sekiz bin beş yüz akçe hakkım olup meblağ-ı mezbûru bin yetmiş üç senesi Zilka‘desi’nin onuncu gününde merkūm Hasan Beşe’den taleb ve da‘vâ eylediğimde vesâtat-ı muslihîn ile meblağ-ı mezbûr kırk sekiz bin beş yüz akçeden yirmi iki bin akçe üzerine mezbûr Hasan Beşe beni inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûrun yedi bin akçesini yedinden ahz u kabz edip zimmetinde on beş bin akçe bâkī kalmış idi hâlâ meblağ-ı bâkī-i mezbûr on beş bin akçeyi mezbûr Hasan Beşe yedinden tamâmen ahz u kabz eyledim. Meblağ-ı merkūma ve târih-i kitâba gelince beynimizde cârî olan ahz u i‘tâ ve karz ve vedî‘at ve şirket ve mudârebe ve sâir hukūk-ı ma‘lûme ve mechûleye müte‘allika cemî‘-i de‘âvî ve mütâlebe ve eymân ve muhâsamâtdan mezbûr Hasan Beşe’yi ibrâ-ı âm-ı kātı‘ü’n-nizâ‘la ibrâ eyledim min ba‘d merkūm Hasan Beşe kıbelinden vechen mine’l-vücûh ve sebebin mine’l-esbâb benim için hak ve alâka kalmadı dedikde mezbûr Hasan Beşe ben dahi zikr olunan husûsa müte‘allika âmme-i de‘âvî ve mütâlebâtdan merkūm Süleyman Çelebi’yi ibrâ-ı âm ile ibrâ eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Cemâziyelâhir sene erba‘a ve seb‘în ve elf. Şuhûdü’l-hâl: Süleyman Beşe b. Bayram, Abdurrahman Beşe, Yazıcı Ahmed Çelebi, Receb b. Murad, İsmail Beşe ve gayruhüm.