İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 944 Hüküm no: 1286 Orijinal metin no: [143b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Abdullah’ın Yamandi v. Hıristo’daki alacağını tecil ettiği Mahmiye-i İstanbul’da Nişancı Cafer Çelebi mahallesinde sâkin Gevrekçi Yamandi v. Hıristo nâm zimmî meclis-i şer‘-i hatîrde mahmiye-i mezbûrda el-Hâc Timur mahallesinde sâkin işbu râfi‘ü’l-kitâb Mustafa Bey b. Abdullah mahzarında ikrâr ve takrîr-i kelâm edip mezbûr Mustafa Bey’e cihet-i deyn-i şer‘îden on bin akçe zimmetimde lâzımü’l-edâ ve vâcibü’l-kazâ deynim olup meblağ-ı mezbûru def‘aten edâya iktidârım olmamağla, târih-i kitâbdan doksan gün tamâmında iki bin akçe ve üç yüz gün tamâmında sekiz bin akçe vermeğe te’cîle tâlib olduğumda, ol dahi ecel-i mezbûru kabûl eyledi dedikde gıbbe’t-tasdîk medyûn-ı mezbûrun li ebeveyn er karındaşı Yorgi nâm zimmî meclis-i mezbûrda meblağ-ı müeccel-i mezkûr on bin akçeyi tarafeynden emr [ve] kabûlü hâviye kefâlet-i sahîha-i şer‘iyye ile kefîl bi’l-mâl oldum dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cemâziyelâhir sene 1074. Şuhûdü’l-hâl: Abdi Çelebi b. [Hüseyin], Şükrullah b. Mustafa, Mehmed b. Ramazan ve gayruhüm.