İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 945 Hüküm no: 1287 Orijinal metin no: [144a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. İbrahim’in Ahmed b. Şaban’dan mehir alacağının olmadığı Mahmiye-i İstanbul hısnı ebvâbından Yenikapı kurbunda Koca Mehmed Paşa odalarında sâkine Fâtıma bt. İbrahim nâm hâtun dîvân-ı sa‘âdet-makrûnda ma‘kūd mahfil-i kazâda, mahmiye-i mersûmede Koruk Mahmud mahallesinde sâkin işbu râfi‘ü’l-kitâb Ahmed b. Şaban mahzarında üzerine takrîr-i da‘vâ edip târih-i kitâbdan on gün mukaddem merkūm Ahmed beni talâk-ı bâyin ile tatlîk eylemişdi hâlâ zimmetinde mütekarrir ve ma‘kūdun-aleyh olan altı bin beş yüz akçe mehr-i müeccelimi ve nafaka-i iddet-i mu‘ayyene-i ma‘lûmemi mezbûr Ahmed’den taleb ederim suâl olunsun dedikde gıbbe’s-suâl mezkûr Ahmed cevâbında târih-i mezbûrda mezbûre Fâtıma zimmetimde mütekarrir olan meblağ-ı mersûm altı bin beş yüz akçe mehr-i müecceli ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzre benimle muhâla‘a-i sahîha-i şer‘iyye ile muhâla‘a edip zevciyyete müte‘allika zimmetimi ibrâ eylemiş idi. Ol vechile mehr-i mezbûr mütâlebesinden zimmetim berî olmuşdur deyû def‘le mukābele edicek gıbbe’l-istintâk mezbûre Fâtıma târih-i mezbûrda vech-i muharrer üzre muhâla‘a-i sahîha-i şer‘iyye ile muhâla‘a olduğunu bi tav‘ihâ ikrâr ve i‘tirâf etmeğin ikrârı mûcebince bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Hurrire fî târihi’l-mezbûr. Şuhûdü’l-hâl: Yakub Efendi b. Şaban, Mehmed Efendi b. Süleyman, Sefer b. Mehmed, Mustafa b. Mehmed, Mehmed b. Mahmud ve gayruhüm.