Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 98 Hüküm no: 90 Orijinal metin no: [13b-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gevher bt. Abdullah’ın kocası Âşir Beşe ile anlaşarak boşandığı (muhâla‘a) Medîne-i mahmiye-i Kostantıniyye mahallâtından Âşıkpaşa Mahallesi’nde sâkine Gevher bt. Abdullah nâm hatun meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzıra olup râfi‘-i hâze’l-kitâb Âşir Beşe b. Ali Dede nâm zevci ile muhâla‘a etti. Zevc-i mezbûr dahi nikâhında ma‘kūdün-aleyh râyicü’l-vakt dört bin akçe mehr-i müecceli, nafaka-i iddeti ve meûnet-i süknâsı mukābelesinde zevce-i mezbûresi ile hul‘ eyledi. Mezbûre Gevher bu sûretle akd-i cedîd ve mehr-i müste’nif olmadan zevc-i mezkûra helâl olmayacak şekilde bâyinen ayrılmış oldu. Sonra hukūk-ı zevciyyete müte‘allik cemî‘ de‘âvîden her biri diğerinin zimmetini ibrâ-yı âmm-ı kātı‘un li’n-nizâ‘ ile ibrâ etti. Cerâ zâlike ve hurrire fi’l-yevmi’s-sânî min-Şevvâl li-sene 1063. Şuhûdü’l-hâl: el-Hâc Hüseyin b. Receb, Mustafa Beşe b. Ahmed, Ali Bey b. Mehmed, Mehmed Beşe b. Süleyman ve gayruhum