Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 99 Hüküm no: 91 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Süleyman’ın Kara Bali Evkafı’na ait olan evdeki hissesini Kâtibe bt. Abdullah’a ferağ ettiği Mahmiye-i İstanbul’da Pirinççi Sinan Mahallesi’nde sâkin kıdvetü kuzâti’l-islâm ve mefharü vülâti’l-enâm es-Seyyid Süleyman Efendi b. Mustafa meclis-i şer‘-i kavîm-i vâcibü’t-ta‘zîmde zevcesi ve mu‘tıkı olan Hasan b. Abdullah nâm kimesnenin mu‘takası sâhibetü’l-kitâb Kâtibe bt. Abdullah nâm hatun mahzarında ikrâr-ı tâm ve tebyîn-i merâm edip mahalle-i mezbûrede vâki‘ merhûm Kara Bali Evkāfı’ndan icâre-i mu‘accele ve ayda kırk beş akçe ücret-i müeccele ile taht-ı tasarrufumda olup etrâf-ı selâsesi vakf-ı mezbûr ve taraf-ı râbi‘i tarîk-i âm ile mahdûd ve mümtâz muhavvata-i dâhiliyesi iki bâb beyt-i ulvî ve bir sofa ve bir köşk ve kenîf-i fevkānîyi ve bir bâb beyt-i süflî ve bir matbahı ve müşterek bi’r-i mâyı ve kenîf-i tahtânîyi ve muhavvata-i hâriciyesi iki bâb beyt-i ulvî ve bir sofa ve ahır ve kenîfi müştemil olan menzilde hakk-ı tasarrufumu vakf-ı merkūma meşrûtiyet üzere mütevelliye olan Sâliha bt. Ahmed izniyle mârru’z--zikr Kâtibe Hatun’a ferağ ve tefvîz edip ol dahi kabûl ve tefevvüz edip menzil-i mahdûd-ı mevsûfu (...) teslîm mezbûre dahi tesellüm eyledi, ba‘de’l-yevm keyfe mâ türîd ve tehtâr mutasarrıfe olup beher mâh kırk beş akçe ücret-i müeccelesini cânib-i vakfa edâ eyle dedikde müşârun-ileyh es-Seyyid Süleyman Efendi’yi kelimât-ı muharreresinde merkūme Kâtibe Hatun bi’l-muvâcehe tasdîk eyledikden sonra zikri sebk eden mütevelliye Sâliha Hatun’un ferağ-ı meşrûhuna iznini muhtevî temessük ibrâz edip nazar olundukda mazmûnu min-cemî‘i’l-vücûh takrîr-i sâlifü’l-beyâna mutâbık olmağın bu vesîka-i enîka ba‘de’t-taleb ketb olundu. Tahrîren fî-5 mine’l-Muharremi’l-harâm sene selâse ve sittin ve elf. Şuhûdü’l-hâl: Zü’l-izzi’l-bâzih ve’ş-şerefi’ş-şâmih ve’l-kadri’r-refî‘ ve’l-mecdi’l-menî‘ es-Seyyid Abdurrahman Efendi hazretleri en-nakīb ale’z-zümreti’s-sâdeti’l-murakkıbîn li-celîli’s-sa‘âde mefharü’l-ârifîn ve kıdvetü’l-vâsilîn eş-Şeyh İbrahim Efendi b. Ali el-Aksarayî, mefharü’l-müderrisîn Ömer Efendi b. Mehmed, zübdetü’l-kuzât Mehmed Efendi b. Ahmed el-ma‘rûf bi-Piyâdezâde, kıdvetü’l-müderrisîn Mehmed Efendi b. Mahmud el-Cemâlî, el-Hâc Hasan b. Bali kethüdâ-yı yorgancıyân, el-Hâc Nizami b. Bali birâder-i mezbûr, Ali b. Hasan Odabaşı, Derviş Mustafa b. Ali el-Mevlevî, el-Hâc Mustafa Çelebi b. Kasım, Ali vakfü’l-merhûm Kılıç Ali Paşa.