İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 947 Hüküm no: 1292 Orijinal metin no: [144b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Ağa b. Mehmed’in çiftlik vs. mülklerini Mustafa Ağa b. Hasan’a sattığı Medîne-i Ebâ Eyyûb-i Ensârî müzâfâtından kasaba-i Silivri’de sâbıkan kethüdâ yeri olan fahrü’l-a‘yân Ömer Ağa b. Mehmed meclis-i şer‘-i hatîr-i lâzımü’t-tevkīrde sâbıkan dergâh-ı âlî yeniçerilerinin kethüdâsı olan umdetü’l-emâcid ve’l-ekârim câmi‘ü’l-mehâmid ve’l-mekârim zü’l-kadri’r-refî‘ ve’l-câhi’l menî‘ işbu râfi‘ü hâzihi’r-rakam Mustafa Ağa b. Hasan tarafından ikrâr-ı âtîyi tasdîke vekîl olup vekâleti Osman Beşe b. Halil ve Ali Beşe b. Abdullah nâm kimesneler şehâdetleri ile şer‘an vekâleti sâbite olan hâlâ İstanbul ağası umdetü’l-emâsil ve’l-a‘yân Mehmed Ağa b. Mustafa mahzarında ikrâr ve i‘tirâf edip zikri âtî bey‘in sudûruna değin mülk ve hakkım olup kasaba-i mezbûreye tâbi‘ Kara Sinan nâm karyede vâki‘ tahdîd ve tavsîfden müstağnî mülk çiftliğimi ve iki bâb oda ve abdesthâne ve tahtânî iki oda ve iki anbarı hâviye kule ve bir samanlık ve bi’r-i mâ ve iki fırın ve hâricinde bir bâb oda ve sundurma ve diğer kebîr ahır ve iki ahır ve iki savat ve bir kıt‘a bostan ve karye-i Fener’de vâki‘ bir kıt‘a sekiz bin çubuklu mülk bağımı ve çiftlik-i mezbûr içinde mevcûd elli çift kara sığır öküzü ve bir çift camus tosunu ve üç re’s kara sığır düvesi ve beş re’s kara sığır buzağısı ve beş aded döğen ve bir yurlarlı? keser ve sâir âlât-ı zirâ‘at ve harâseti bi safkatin vâhidetin yüz sekiz bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-ı şer‘î ile müvekkil-i mûmâ-ileyh Mustafa Ağa’ya bey‘ edip ol dahi iştirâ ve kabûl eyledikden sonra yine zikri âtî tefvîzin sudûruna değin hakk-ı müfavvazım olup çiftlik-i mezbûra tâbi‘ ma‘lûmü’l-hudûd bir kıt‘a çayır ve Çavuşoğlu ile müşterek nısf çayır ve lede’l-ahâlî ma‘lûmü’l-hudûd olup tahmînen otuz müd tohum istî‘âb eder cemî‘ tarlalarımı sâhib-i arz ma‘rifetiyle yirmi bin akçe ki cem‘an ol dahi tefevvüz ve kabûl eyledikden sonra semen-i mezbûr yüz sekiz bin akçenin ve bedel-i merkūm yirmi bin akçe ki cem‘an yüz yirmi sekiz bin akçenin yirmi sekiz bin akçesini müvekkil-i mûmâ-ileyh yedinden ahz u kabz edip mâ‘adâ olan yüz bin akçe fî târih-i kitâbdan yüz yirmi gün tamâmına dek te’cîl edip müvekkil-i mûmâ-ileyh ecel-i mezbûru kabûl eyledi. Emlâk-i merkūme ile arâzi-i mesfûremi mahallinde ahz u kabza taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fî târihi’l-mezbûr. Şuhûdü’l-hâl: Abdülfettah Efendi b. ( ), Mustafa Ağa serçavuşân, Mehmed Efendi b. Seyfullah, Osman Beşe b. Abdullah, Ali Beşe b. Abdi.