İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 948 Hüküm no: 1293 Orijinal metin no: [144b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arzuman v. Peder’in arsasını Kıymet bt. Peder ve Serkis v. Sinan’a sattığı Mahmiye-i İstanbul’da Koska fırını kurbunda Kızıltaş mahallesi sükkânından hayyât tâifesinden Arzuman v. Peder nâm zimmî meclis-i şer‘-i hatîrde kendi nefsinden asîl, zevcesi Kıymet bt. Peder nâm nasrâniyye tarafından alâ mâ hüve nehcü’s-sübût tasdîk-ı âti’z-zikre sâbitü’l-vekâle vekîl olan Serkis v. Sinan nâm zimmî muvâcehesinde ikrâr ve takrîr-i kelâm edip zikri âtî bey‘in sudûruna dek mülk ve hakkım olup mahmiye-i mezbûrede Kâtib Kasım mahallesinde vâki‘ bir tarafı tarîk-i âm ve bir tarafı hâs ve bir tarafı Devlet v. Zafir ve bir tarafı Sultana bt. Yakob mülkleri ile mahdûd muhterik mülk menzil arsasını, müştemilâtı olan bi’r-i mâ ve kenîf ile sâlifü’z-zikr kıymet ile zevci merkūm Serkis’e ale’l-iştirâki’s-seviy otuz bin nakd-i râyic fi’l-vakt akçeye bey‘-i bâtt-ı sahîh-ı şer‘î ile bey‘ ve teslîm edip anlar dahi iştirâ ve kabûl ve kabz ve teslîm eylediklerinden sonra semeni olan meblağ-ı merkūm otuz bin akçeyi bi’t-tamâm yedlerinden alıp kabz eyledim ba‘de’l-yevm arsa-i mahdûde-i mezbûre merkūme Kıymet ile mezbûr Serkis’in ale’l-iştirâki’s-seviy mülkleri olmuşdur. Nice dilerlerse tasarruf eylesinler dedikde mukırr-ı mezbûr Arzuman’ı kelimât-ı meşrûhasında mesfûr Serkis asâleten ve vekâleten vicâhen tasdîk ve tahkīk etmeğin mâ vaka‘a bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Cemâziyelevvel sene 1074. Şuhûdü’l-hâl: El-Hâc Ali Hayyât, Rıdvan b. Abdullah, Zülfikār b. Abdullah ve gayruhüm.