İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 70 Hüküm no: 6 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kör Ali Ağa oğlu Süleyman’ın babasının mirastan dolayı yeniçeri beytülmâlcisi Hüseyin Ağa’dan alacağı olduğunun tesbit edildiği Süleyman nâm kimesne dergâh-ı mu‘allâya arzuhâl edip mahrûse-i İstanbul’da sâkin bundan akdem bunun babası Kör Ali nâm kimesne fevt oldukda muhallefâtı irs-i şer‘le buna intikāl edip sâbıkan beytülmâl üzerine hâzır olan kimesne bi gayri hakkın bin guruş alıp ziyâde hayf ve gadr eylediğin bildirip şer‘le görülüp zikr olunan akçesin mezbûr Hüseyin’den geri alıverilip icrâ-yı hak olunmak bâbında taraf-ı saltanat-ı aliyyeden bu fakīr[e] hitâben bin seksen altı senesi Zilka‘desi evâhiri ile müverrah ve tuğrâ-yı garrâ-yı sultânî ile mücellâ emr-i celîlü’l-kadr vâr[id] olmağın mahmiye-i İstanbul’da Sinan Paşa mahallesi sâkinlerinden iken maktûlen vefât eden Kör Ali Ağa’nın sulbî oğlu ve hasren vârisi olan mezbûr Süleyman nâm sagīrin tesviye-i umûruna kıbel-i şer‘den mansûb vasîsi olan râfi‘-i hâze’l-kitâb Hasan Beşe b. Mehmed nâm kimesne meclis-i şer‘-i şerîf-i enverde mahmiye-i mezbûrda sâbıkan yeniçeri beytülmâl nâzırı olan Hüseyin Ağa b. Receb nâm kimesne mahzarında üzerine da‘vâ ve takrîr-i kelâm edip [4a] merkūm Ali Ağa bin seksen iki senesinde vefât ettiğinde terekesinden bin esedî guruşu bundan mukaddem sagīr-i mezbûrun vasîsi olan Kalender b. Mehmed Çelebi yedinden merkūm Hüseyin Ağa bi gayri hakkın ahz u kabz etmekle hâlâ mezbûr Hüseyin Ağa’ya suâl olunup meblağ-ı mezbûrun bana alıverilmesi bi’l-vesâye matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olun[duk]da, mahalle-i mezbûre imâmı olan Abdullah Efendi b. Mehmed ve Haleb tüccârından olup mahmiye-i mezbûrede Pîrî Paşa hanı’nda sâkin el-Hâc Şehabeddin b. Ganem nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūm Hüseyin Ağa bi gayri hakkın bizim huzûrumuzda ahz u kabz etmiş idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şâhidân-ı mezbûrânın keyfiyyet-i hâllerini suâl için savb-ı şer‘-i şerîfden irsâl olunan Mevlânâ Mustafa Efendi b. Abdülaziz evvelâ zikr olunan mahalleye varıp ahâlîsinden el-Hâc Hüseyin Ağa b. Osman ve Hüseyin Beşe b. Hasan ve el-Hâc Yusuf b. Abdullah ve hamamcı el-Hâc Ahmed b. Ramazan ve Halil Beşe b. Mahmud el-Hâc Osman b. Murad ve Ali Bey b. İbrahim ve Mehmed Beşe b. İbrahim ve Mehmed Beşe b. Abdüllatîf ve Ali Beşe b. Mehmed ve Hasan Çelebi b. Ahmed nâm kimesnelerden şâhid-i mezbûr Abdullah Efendi’nin keyfiyyeti hâlini suâl edip ve sâniyen zikr olunan Pîrî Paşa hanı’na varıp tüccârdan olup câmi‘-i mezbûr sükkânından olan el-Hâc Hüseyin b. İbrahim ve Mehmed Çelebi b. Abdurrahman ve Mustafa Çelebi b. Derviş ve es-Seyyid Derviş b. Mehmed ve Receb Çelebi b. Hasan ve el-Hâc Nasûh b. Abdülkādir ve el-Hâc Hasan b. Mahmud ve el-Hâc Abdünnebi b. Ebûbekir ve el-Hâc Kalender b. İbrahim ve el-Hâc Mustafa b. Ahmed nâm kimesnelerden şâhid-i mezbûr el-Hâc Şehabeddin’in keyfiyyet-i hâlini suâl eyledikde her biri şâhidân-ı mezbûrân için adl ve makbûlü’ş-şehâdedir deyû haber verdiklerini Mevlânâ-yı mezbûr mahallinde tahrîr ve ma‘an irsâl olunan Muharrem b. Abdullah ile meclis-i şer‘a gelip alâ vukū‘ihi inhâ ve takrîr etmekle sırren ve alenen ta‘dîl ve tezkiyye olunduklarından sonra şehâdetleri makbûle olmağın fermân-ı âlî mûcebince meblağ-ı mezbûr bin guruş[u] müdde‘î-i mezbûr Hasan Beşe’ye edâ ve teslîm[e] merkūm Hüseyin Ağa’ya tenbîh olunmağın mâ vaka‘a bi’t-taleb ketb olundu. Fi’s-sâlis mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Kethüdâ-yı Hazret-i Efendi, el-Hâc Hüseyin Ağa b. Üveys, el-Hâc Abdurrahman b. Musa, Receb Ağa b. Ramazan, el-Hâc Kasım b. el-Hâc Receb, Mehmed b. el-Hâc Receb, Mehmed Beşe b. Mirza 4 c[emâ‘at], Hasan Beşe b. Ebûbekir, Hüseyin b. Hasan 4 c[emâ‘at], Mehmed b. Ahmed 4 c[emâ‘at], Abdullah Efendi Mehmed el-İmâm, Mahmud Beşe b. Mustafa, Süleyman Beşe b. Abdullah, Receb b. Şaban.