İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 77 Hüküm no: 12 Orijinal metin no: [5b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in mirasçısına borcunu ödemesi karşılığında iki adet ev hüccetinin Abdülkadir Efendi’ye geri verileceği Mahmiye-i İstanbul’da Akbıyık mahallesinde sâkine iken bundan akdem vefât eden Fâtıma bt. Mehmed Efendi nâm hâtunun li ebeveyn karındaşı oğlu olup mahrûse-i Mısır-ı Kahire’den gelirken esnâ-i tarîkde Çakıt nâm mevzi‘de vefât eden Reiszâde? Abdürrahim Efendi’nin vâlidesi ve hasren vârisesi olan râfi‘atü hâze’l-kitâb Sâliha bt. Cafer nâm hâtun tarafından husûs-ı âti’l-beyâna vekîl olduğu yedinde olan mazmûn[u] müsbit hüccet-i şer‘iyye ile sâbit olan Mehmed Çavuş b. Süleyman nâm kimesne meclis-i şer‘-i şerîfde mahmiye-i mezbûre Kabasakal mahallesi sükkânından Abdülkādir b. Mustafa nâm kimesne mahzarında üzerine ikrâr ve takrîr-i kelâm edip târih-i kitâbdan sekiz sene mukaddem müteveffât-ı mezbûre Fâtıma Hâtun’dan hayâtında iki yüz esedî guruşunu mezbûr Abdülkādir’e ikrâz ve teslîm ol dahi iktirâz ve tesellüm ettikden sonra meblağ-ı mezbûru kable’l-ahz mezbûre Fâtıma Hâtun vefât etmekle hâlâ mezbûr Abdülkādir’e suâl olunup meblağ-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr, müdde‘î-i mezbûrdan müdde‘âsını mübeyyine beyyine taleb olundukda zikr olunan Kabasakal mahallesi ahâlîsinden Ahmed b. Ömer nâm kimesne ile mârrü’z-zikr Akbıyık mahallesi sâkinelerinden Cenane bt. Abdullah ve Müstakim bt. Abdullah nâm hâtunlar li ecli’ş-şehâde ve meclis-i şer‘a hâzırûn olup istişhâd olunduklarında fi’l-hakīka müteveffât-ı mezbûre Fâtıma Hâtun hayâtında târih-i kitâbdan sekiz sene mukaddem iki yüz guruşunu mezbûr Abdülkādir’e ikrâz ve teslîm ol dahi iktirâz ve tesellüm etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olup mezbûr Abdülkādir dahi meblağ-ı mezbûr iki yüz guruşu târih-i kitâbdan iki sene mukaddem müteveffât-ı mezbûre Fâtıma Hâtun’dan ikrâz ve kabz eylediğini ikrâr, lâkin meblağ-ı mezbûr mukābelesinde müteveffât-ı mezbûreye teslîm eylediğim bir temessük [ve] zikr olunan Kabasakal mahallesinde vâki‘ menzilimin iki kıt‘a hücceti, mahmiye-i mezbûrede Zeyrek mahallesinde sâkin Şeyh Mehmed Efendi yedinde olmağla tahlîs olunmak murâdımdır deyicek [6a] meblağ-ı mezbûr iki yüz guruşu müdde‘î-i merkūm Mehmed Çavuş’a edâ ve teslîme mezbûr Abdülkādir tenbîh olundukdan sonra mezbûr Mehmed Çavuş zikr olunan temessük ve hüccetleri merkūm Şeyh Mehmed Efendi[’den] tahlîse ta‘ahhüd etmeğin mâ vaka‘a bi’t-taleb ketb olundu. Fi’l-yevmi’l-hâmis aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Sâbıkan Surre emîni olan fahrü’l-akrân Hasan Ağa, Zahrü’l-akrân el-Hâc Kemaleddin Kethüdâ-yı Hazret-i Efendi, el-Hâc Mehmed b. el-Hâc Receb, el-Hâc Mehmed b. Ali, Musa Halîfe b. Receb, Mustafa Beşe b. Abdullah ve gayruhüm mine’l-hâzırîn