İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 78 Hüküm no: 13 Orijinal metin no: [6a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in vârislerinin Abdülkadir Efendi’den alacaklarını tahsil ettikleri Mahmiye-i İstanbul’da Akbıyık mahallesi sâkinelerinden iken bundan akdem vefât eden Fâtıma bt. Mehmed nâm hâtunun li ebeveyn karındaşı oğlu vârisi olup mahrûse-i Mısır-ı Kahire’den gelirken esnâ-i tarîkde Çakıt nâm mevzi‘de vefât eden Reiszâde Mehmed Efendi nâm kimesnenin vâlidesi [ve] hasren vârisesi olan Sâliha bt. Cafer nâm hâtun zâtı ma‘rifet-i şer‘iyye ile ârifân Ahmed Beşe b. Ömer ve Osman Bey b. Ahmed nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde râfi‘-i hâze’l-kitâb Abdülkādir b. Mustafa nâm kimesne mahzarında ikrâr ve takrîr-i kelâm edip müteveffât-ı mezbûre Fâtıma Hâtun hayâtında bin yetmiş sekiz senesinde iki yüz esedî guruşunu mezbûr Abdülkādir’e ikrâz ve teslîm ol, dahi iktirâz ve kabz ettikden sonra meblağ-ı mezbûr[u] kable’l-ahz mezbûr Fâtıma Hâtun vefât etmekle bundan akdem tarafımdan vekîlim olan işbu hâzır bi’l-meclis Mehmed Çavuş b. Süleyman nâm kimesne meblağ-ı mezbûr iki yüz guruşu mezbûr Abdülkādir’den da‘vâ ve şuhûd-ı udûl ile müdde‘âmı isbât edip hükm-i şer‘î lâhık olduğundan sonra mezbûr Abdülkādir meblağ-ı mahkûmun-bih iki yüz guruşun doksan guruşunu nakid verip ve doksan guruşu için işbu orta boylu açık kaşlı gök ala gözlü Rûsiyyetü’l-asl Mülâyim nâm câriyesini ve yirmi guruş için işbu siyah kabzalı sîm kılıcını bana bey‘ ve teslîm ve takās, ben dahi meblağ-ı mezbûru ahz ve zikr olunan câriyeyi ve kılıcı ber vech-i muharrer iştirâ ve tesellüm ve mukāssa ve kabûl eylediğimden sonra husûs-ı mezbûra müte‘allika âmme-i da‘vâdan mezbûr Abdülkādir’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Mehmed Çavuş b. Mustafa, Ahmed Beşe b. Ömer, Ahmed b. Abdullah, Mustafa Bey b. Abdullah, hâssa mutfak ustası Abdi Usta ve gayruhüm mine’l-hâzırîn