İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 78 Hüküm no: 14 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Şaban’ın el-Hâc Ahmed’den muhâla‘a yoluyla boşandığı Mahmiye-i İstanbul’da Karabaş mahallesi sâkinelerinden Ayşe bt. Şaban nâm hâtun meclis-i şer‘-i şerîf-i lâzımü’t-teşrîfde, zevc-i dâhil-bihâsı bâ‘is-i hâze’l-kitâb el-Hâc Ahmed b. el-Hâc Mustafa nâm kimesne mahzarında ikrâr ve takrîr-i kelâm edip zevcim mezbûr el-Hâc zimmetinde mukarrer ve ma‘kūdun-aleyh olan yedi yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre mezbûr el-Hâc Ahmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eyledikden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ’-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Bey b. Mustafa, Ali Bey b. Seyyidim?, Ahmed Beşe b. Abdullah, Mehmed b. Veli, Ali Beşe b. Abdullah, Burnas Mustafa b. Abdullah, Veli Bey b. Mahmud, Mehmed b. Ali ve gayruhüm.