İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 79 Hüküm no: 15 Orijinal metin no: [6a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynî bt. Abdullah’ın Ahmed Ağa’daki alacağını tahsil için Mehmed Çelebi’yi vekil tayin ettiği Mahmiye-i İstanbul’da Muhtesib İskender mahallesinde sâkine olup zâtı ma‘rifet-i şer‘iyye ile ârifân Ali Beşi b. Veli ve Veli b. Derviş nâm kimesne ta‘rîfleriyle mu‘arrefe olan Aynî bt. Abdullah nâm hâtun meclis-i şer‘-i şerîfde bâ‘is-i hâze’l-vesîka Mehmed Çelebi b. Ali mahzarında ikrâr ve takrîr-i kelâm edip mahmiye-i merkūmede Pîrinççi Sinan mahallesinde sâkin iken bundan akdem vefât eden mu‘tıkım Ahmed Ağa nâm kimesne sıhhat ve nifâz-ı tasarrufâtında malından üç yüz esedî guruş bana verile deyû vasiyyet ve tenfîzine terekesine vâzı‘ü’l-yed olan gāib ani’l-meclis Mehmed Ağa nâm kimesneyi vasiyy-i muhtâr nasb ve ta‘yîn eylediğinden sonra musırran alâ İsâ’ihî fevt olmağın meblağ-ı mezbûr üç yüz esedî guruşu merkūm Mehmed Ağa’dan da‘vâ ve taleb ve ahz u kabza ve bana îsâle ve kabz ve îsâle mütevakkıf olduğu umûrun küllîsine tarafımdan merkūm Mehmed Çelebi’yi vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve merâsimini edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Osman b. Ömer, Ali b. Ali, Veli b. Derviş, Mehmed Efendi b. Mehmed, İbrahim b. Ahmed ve gayruhüm mine’l-hâzırîn.