İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 80 Hüküm no: 16 Orijinal metin no: [6a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun’un vasiyeti Mahmiye-i İstanbul’da Şah Hûbân mahallesi sâkinelerinden Fâtıma bt. ( ) nâm hâtun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân İmâm Ahmed Efendi b. Ali ve Mehmed Çelebi b. Muslu nâm kimesneler şehâdetleriyle sâbit olan İmâm Abdurrahman Efendi b. Hanefi meclis-i şer‘-i şerîfde müvekkile-i mezbûrenin zevci bâ‘is-i hâze’l-kitâb el-Hâc Hüseyin b. Bayezid nâm kimesne mahzarında ikrâr ve takrîr-i kelâm edip müvekkile-i mezbûre Fâtıma Hâtun bi emrillâhi te‘âlâ fevt [6b] olduğumda sülüsü kabz olundukdan sonra bin beş yüz akçesi sünnet-i seniyye üzre techîz ve tekfîne sarf olunup ve bin akçesi iskāt-ı salâtıma [ve] üç yüz akçesi makberem üzerine telkīn eden kimesneye verilip ve sekiz bin dokuz yüz akçesi yevm-i mevtimde helva ve sâir eyyâm-ı mu‘tâdede fukarâya infâk olunmak için tabh-ı ta‘âma sarf olundukdan sonra bâkīsi zevcim mezbûr el-Hâc Hüseyin dilediği vücûh hayrâta sarf ede deyû vasiyyet edip tenfîzine mezbûru vasiyy-i muhtâr nasb ve ihtiyâr edip mezbûr el-Hâc Hüseyin dahi vesâyet-i mezbûreyi kabûl eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Mahmud Çavuş b. Ali, el-Hâc Mehmed b. el-Hâc Receb, Kemhacızâde Mehmed Çelebi b. Mustafa, Hasan Efendi b. Mehmed, Abdullah b. Abdullah, Müezzin Osman Halîfe, Hammîmîzâde Mehmed Çelebi, el-Hâc Hasan Hüseyin b. ( ), Ali Efendi b. ( ), İbrahim Çelebi b. ( ), el-Hâc Hasan b. ( ) ve gayruhüm.