İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 81 Hüküm no: 18 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap Dimitri’nin Şaban Beşe’nin ortağı Abdülkadir’de alacağı olduğu iddiasını ispatlayamadığı Kasab tâ’ifesinden Dimitri v. Panas nâm zimmî meclis-i şer‘-i şerîfde bâ‘is-i hâze’l-kitâb Şaban Beşe b. Ahmed nâm kimesne mahzarında üzerine da‘vâ ve takrîr-i kelâm edip mezbûr Şaban Beşe’nin şerîki gāib ani’l-meclis Halebli Abdülkādir nâm kimesne zimmetinde bundan akdem yedimden iştirâ ve kabz eylediği adedi beynimizde ma‘lûm koyun bahâsından on sekiz esedî guruş hakkım olup meblağ-ı mezbûr on sekiz esedî guruşun dokuz buçuk esedî guruşu mezbûr Abdülkādir zimmetinde bâkī kalmışdı hâlâ merkūm Şaban Beşe’ye suâl olunup şirket-i mezbûresine binâen meblağ-ı bâkī mezbûrun alıverilmesi matlûbumdur dedikde gıbbe’s-suâl ve akībe’l-inkâr, müdde‘î-i mezbûr Dimitri’den müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ gāib-i merkūm Abdülkādir ile şerîkleri olmayıp, ol vechile gāib-i mezbûrun müdde‘î-i mezbûr yedinden ber vech-i muharrer iştirâ ve kabz eylediği mârrü’z-zikr koyun bahâsından zimmetinde deyni olan meblağ-ı bâkī-i mezbûr sekiz buçuk esedî guruşun elân üzerine edâsı lâzım olduğuna mezbûr Şaban Beşe’ye yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr Dimitri bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-âşir mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Osman b. Ömer, Muharrem b. Şaban, Mehmed b. Abdullah, İbrahim Çelebi b. Mehmed ve gayruhüm.