İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 81 Hüküm no: 19 Orijinal metin no: [6b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yoğurtçu Aleksi v. Yani’nin kendisini yaralayan Mehmed Beşe ile sulh olduğu Mahmiye-i İstanbul’da Lütfi Paşa mahallesinde vâki‘ yoğurtçu kârhânesinde sâkin yoğurtçu tâ’ifesinden Aleksi v. Usta Yani nâm zimmî meclis-i şer‘-i hatîr lâzımü’t-tevkīrde altmış altı haseki cemâ‘atinin karakullukçularından Mehmed Beşe b. Veli nâm kimesne mahzarında ikrâr ve takrîr-i kelâm edip târih-i kitâbdan bir gün mukaddem mahalle-i mezbûrede Şaban Hâtun Sarayı demekle ma‘rûf sarayda vâki‘ çeşme kurbunda ba‘de’l-asr mezbûr Mehmed Beşe sol koluma bir siyah kabzalı Macar bıçağı ile vurup mecrûh etmeğin da‘vâ edip isbât edememek ile beynimizde muslihûn tavassut edip [7a] mezbûr Mehmed ile da‘vâ-yı mezkûremden an inkâr altı yüz akçe üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr altı yüz akçeyi mezbûr [Mehmed] Beşe’nin yedinden bi’t-tamâm ve’l-kemâl ahz u kabz edip min ba‘d mezbûr Mehmed Beşe’nin zimmetini cerh-i mezbûre müte‘allik cemî‘ de‘âvî ve mütâlebât ve nizâ‘ ve muhâsamâtdan ibrâ-i âmm-ı kātı‘ü’n-nizâ‘ ibrâ ve iskāt edip mezbûr Mehmed Beşe ile vechen mine’l-vücûh ve sebeben mine’l-esbâb da‘vâ ve nizâ‘ım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İvaz Beşe b. Abdullah el-Mübâşir, Mustafa Çelebi b. Mehmed, İbrahim Çelebi, Ali Beşe b. Abdullah el-Cerrâh.