İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 82 Hüküm no: 20 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Ebûbekir’in gemisini eşi Fâtıma bt. Siyavuş’a satıp bedelini Fâtıma’ya olan borcuna takas yaptığı Mahmiye-i İstanbul’da Haydarpaşa mahallesi sâkinlerinden olup sefîne reislerinden olan Ahmed Beşe b. Ebûbekir nâm kimesne meclis-i şer‘-i şerîfde zevce-i menkûhası bâ‘isetü hâze’l-kitâb Fâtıma bt. Siyavuş nâm hâtun mahzarında ikrâr ve takrîr-i kelâm edip yedimde mülk ve hakkım olup hâlâ Galata’da Yağkapanı önünde merbût yirmi zirâ‘ şayka ta‘bîr olunur sefînemi ve içinde olan iki demir ve bir kamane? ve bir penete? ve bir tirinketeyi bi safkatin vâhidetin zevcem mezbûre Fâtıma’ya mezbûr seksen bir buçuk guruşa bey‘-i kat‘î ile bey‘ ve teslîm ol dahi ber vech-i muharrer iştirâ ve tesellüm ettiğinden sonra semen-i mezbûru zimmetimde hakkı olan yüz seksen bir buçuk guruşa takās, ben dahi mukāssa ve kabûl eyledim ba‘de’l-yevm zikr olunan sefîne zevcem mezbûre Fâtıma’nın mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’r-râbi‘ aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Ömer Çelebi el-Hâc Mehmed, İbrahim Çelebi b. Mehmed, el-Hâc Şaban b. Abdullah, Müftîzâde Mehmed Efendi, Mustafa Çelebi b. Abdullah