İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 82 Hüküm no: 21 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Hasan Efendi’nin Hasan Ağa b. Mehmed’e yaptığı ev satışından olan alacağında anlaştıkları Husûs-ı âti’l-beyânın mahallinde tahrîr iltimâs olunmağın savb-ı şer‘den irsâl olunan Mevlânâ Mehmed Efendi mahzarında fahrü’l-kuzât es-Seyyid Hasan Efendi’nin mahmiye-i İstanbul’da merhûm ve mağfûrun-leh Sultan Mehmed Hân -aleyhi’r-rahmeti ve’l-gufrân-hazretlerinin câmi‘-i şerîfi kurbunda Molla Kirmasti mahallesinde sâkin olduğu menzile varıp zeyl-i rakīmde muharrerü’l-esâmî müslimîn huzûrunda akd-i meclis-i şer‘-i mübîn eyledikde mûmâ-ileyh es-Seyyid Hasan Efendi meclis-i ma‘kūd-ı mezbûrda, bâ‘is-i hâze’l-kitâb Hasan Ağa b. Mehmed nâm kimesne mahzarında ikrâr ve takrîr-i kelâm edip bundan akdem mahmiye-i mezbûrede Hasan Paşa mahallesinde vâki‘, bir tarafdan merhûm eş-Şeyh Hasan Efendi zâviyesi ve bir tarafdan Esircioğlu Hasan Beşe mülkü ve iki tarafdan tarîk-i âm ile mahdûd büyût-ı adîdeyi müştemil arsasının tûlen on beş zirâ‘ ve arzen yedi buçuk zirâ‘ bi hesâb-ı terbî‘î yüz on iki zirâ‘ arsasının senede merkūm eş-Şeyh Hasan Efendi vakfına altmış akçe mukāta‘a ile taht-ı tasarrufunda olup bâkī arsası ve cümle ebniyesi mülküm olan menzilimin ebniye ve mülk olan arsasını, bi cümleti’t-tevâbi‘ ve’l-levâhık mezbûr Hasan Ağa[’ya] dört yüz guruşa bey‘ ve teslîm ve vakf olan arsasını izn-i mütevellî ile ferâğ ve tefvîz ol dahi iştirâ ve tesellüm ve tefevvüz ve kabûl edip semen-i mezbûrun üç yüz altmış guruşunu zimmetimde mezbûr Hasan Ağa cihet-i karzından deynim olan üç [yüz] altmış guruşa ittikās ol dahi mukāssa ve kabûl edip bâkī kırk guruşunu rahmen yedinden ahz u kabz eyledim deyû ikrâr etmiş idim lâkin mezbûr Hasan Ağa cihet-i karzdan deynim için iki yüz doksan guruş olmağla ziyâde yetmiş guruşunu ve semen-i mezbûrdan bâkī kırk guruşunu kabz etmemişken kabz ettim deyû ikrârımdan kâzibim deyû ve bundan akdem mezbûr Hasan Ağa’dan yüz on guruş da‘vâ ettiğimden sonra beynimizde nizâ‘-ı küllî vukū‘undan sonra muslihûn tavassut edip mezbûr Hasan Ağa ile beynimizde elli guruş üzerine inşâ-i akd-i sulh ettiklerinde ben dahi sulh olan meblağ-ı mezbûr elli guruşu mezbûr Hasan Ağa yedinden ahz u kabz ettiğimden sonra menzil-i mezbûr ve semenine müte‘allika âmme-i da‘vâdan mezbûr Hasan Ağa’nın zimmetini ibrâ’-i âm ve kātı‘ü’n-nizâ‘ ile ibrâ ve iskāt eyledim dedikde mezbûr Hasan Ağa dahi mukırr-ı mezbûrun cemî‘ kelimât-ı meşrûhiyyesinde tasdîk ve tahkīk ettiği, Mevlânâ-yı mezbûr mahallinde tahrîr ve ma‘an irsâl olunan Mehmed b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, el-Mu‘îd Memik b. Abdullah, İbrahim Çelebi b. Hasan el-Muhzır, Mustafa Çelebi b. Mehmed, Mehmed Ağa b. Mustafa, Emrullah Çelebi b. Cafer, Derviş Mehmed b. Mustafa, eş-Şeyh Mustafa Efendi b. eş-Şeyh Hasan Efendi, el-Hâc Ali el-Müezzin b. Sinan, Hüseyin Efendi el-Müezzin b. Ömer Sipâh ve gayruhüm mine’l-hâzırîn.