İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 84 Hüküm no: 23 Orijinal metin no: [7b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüstem b. Ahmed’in komşularına zulmeden Ahmed Bey b. Bayram’a onları kurtarmak için para teklif ettiği ve hançerini vaad ettiği para için rehin bıraktığı Vilâyet-i Anadolu’da Çemişkezek kazâsına tâbi‘ Poğoni nâm karye ahâlîsinden Rüstem b. Ahmed nâm kimesne meclis-i şer‘de Ahmed Bey b. Bayram nâm kimesne mahzarında üzerine da‘vâ ve takrîr-i kelâm edip bundan akdem mezbûr Ahmed Bey karye-i mezbûre ahâlîsinden Avanos ve Piz[o] nâm zimmîleri zulmen haps ve rencîde etmekle ben dahi mezbûrları salıver sana bir mikdâr akçe vereyim deyip yedimde mülküm olan on beş guruş kıymetli yarma abanos kabzalı bir hançerimi bi tarîki’l-emâne mezbûr Ahmed Bey’e teslîm ol dahi ahz u kabz etmiş idi hâlâ mezbûr Ahmed Bey’e suâl olunup zikr olunan hançerin mevcûde ise kısmet-i şer‘iyye bana alıverilmek matlûbumdur dedikde gıbbe’s-suâl mezbûr Ahmed Bey cevâbında karye-i mezbûre ahâlîsinden olan mezbûrân Avanos ve Pizo nâm zimmîler ile Haçador ve Beço nâm zimmîler zimmetlerinde cihet-i deyn-i şer‘îden hakkım olan on guruşa müdde‘î-i mezbûr kefîl olmağla meblağ-ı mezbûr on guruş mukābelesinde zikr olunan hançerini bana rehin vaz‘ ve teslîm ben dahi irtihân ve tesellüm etmiş idim deyû def‘ ile mukā[bele] edicek gıbbe’l-istintâk ve’l-inkâr mezbûr Ahmed Bey’den def‘-i mezbûrunu mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka mezbûrûn Avanos ve Pizo ve Haçador ve Beço’nun zimmetlerinde mezbûr Ahmed Bey’e deyni olan meblağ-ı mezbûr on guruşa kefîl olmayıp, zikr olunan hançerini rehin vaz‘ etmediğine müdde‘î-i mezbûr Rüstem’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince zikr olunan hançeri müdde‘î-i mezbûra teslîme mezbûr Ahmed Bey’e tenbîh olunup mâ vaka‘a bi’t-taleb ketb olundu. Fi’l-yevmi’s-sânî mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Ebûbekir b. ( ), Osman Çelebi b. ( ), ve gayruhüm mine’l-hâzırîn.