İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 85 Hüküm no: 24 Orijinal metin no: [7b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaybolan Kostik v. Manol’e vekil olan Ekmekçi Süleyman Çelebi’nin fırındaki bazı eşyaları diğer ortaklara sattığı Husûs-ı âti’l-beyânın mahallinde tahrîr iltimâs olunmağın savb-ı şer‘-i enverden Mevlânâ Hasan Efendi b. el-Hâc Mustafa irsâl olunup ol dahi mahmiye-i İstanbul’da Bezzâzistan-ı Cedîd kurbunda semerciler sûkunda vâki‘ ekmekçi fırınına varıp zeyl-i rakīmde mastûrü’l-esâmî olan müslimîn huzûrlarında akd-i meclis-i şer‘-i mübîn eyledikde ekmekçi tâ’ifesinden Süleyman Çelebi b. Ebûbekir nâm kimesne kendi tarafından asâleten ve şerîki olup gaybet-i münkatı‘a ile gāib olan Kostik v. Manol nâm zimmînin telef ve fesâdı havf olunan eşyâsını bey‘ ve düyûnunu takāsı için taraf-ı şer‘den vekîl nasb olunmağla vekâleti meclis-i ma‘kūd-ı mezbûrda ashâb-ı hâze’l-kitâb el-Hâc Mahmud b. el-Hâc Şaban ve el-Hâc Ali Hisârî ve Ebûbekir Beşe b. el-Hâc Ömer nâm kimesneler ile Bedran v. Markos nâm zimmî mahzarında ikrâr ve takrîr-i kelâm edip zikr-i âtî akdin sudûruna değin gāib-i mezbûr ile ale’l-iştirâki’s-seviy silk-i mülkümüzde münselik olup zikr olunan fırın dâhilinde vâki‘ on re’s bârgir ve fırın alâtından on altı tekne ve kırk yedi panakot? ve beş kürek ve iki terâzi ve üç balta ve iki çanak ve bir maya teknesi ve leğen ve beş su fıçısı ve üç teber tahtası ve bir demir fırın kapağı ve bir sahan ve bir tencere ve bir tava ve bir kahve ibriği ve sekiz çuval ve iki yüz çeki odun ve iki yüz kil tuzu bi safkatin vâhidetin otuz iki bin akçesi bana edâ ve teslîm ben dahi asâlet ve vekâleten ahz u kabz eyledim ba‘de’l-yevm eşyâ-i mezbûre mezbûrûndan el-Hâc Mahmud ve el-Hâc Ali ve Ebûbekir Beşe ve Bedran’ın ale’l-iştirâki’s-seviy [8a] mülk-i müşterâlarıdır, keyfe mâ yeşâ’ûn ve yahtârûn mutasarrıflar olsunlar dedikde gıbbe’t-tasdîki’ş-şer‘î ve’t-tahkīki’l-mer‘î husûs-ı mezbûru Mevlânâ-i mezbûr mahallinde tahrîr ve ma‘an irsâl olunan Halil Beşe b. Osman ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Mehmed Ağa kethüdâ-i ekmekciyân, es-Seyyid Nasrullah Çelebi yiğitbaşı, el-Hâc Abdülbâkī b. el-Hâc Mehmed, el-Hâc Ali b. Ömer el-Hâc, Hasan Beşe b. Ramazan, el-Hâc Mustafa b. Halil, Ali Ağa b. Rüstem, Osman Çelebi b. Mehmed, arpacı Seydî Beşe b. Yusuf, Terzi Ali Beşe b. Abdullah, Ahmed Ağa Çavuş, Yusuf Reis tâbi‘-i Dulkar?, Bektaş Beşe b. ( ) ve gayruhüm.