İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 86 Hüküm no: 25 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in kasap Kostandil’e borcunu ödemesi gerektiği Mahmiye-i İstanbul’da Fenerkapısı dâhilinde kasablar tâ’ifesinden bâ‘isü’s-sifr Kostandil v. Andriye nâm zimmî meclis-i şer‘-i şerîfde Fâtıma bt. Mehmed nâm hâtun mahzarında üzerine da‘vâ ve takrîr-i kelâm edip mezbûre Fâtıma’ya bundan akdem on iki guruş edâ ve teslîm ol dahi yedimden istidâne ve kabz etmiş idi meblağ-ı mezbûra merkūme Fâtıma zimmetinde hakkım kalmağla hâlâ suâl olunup meblağ-ı mezbûru bana edâ ve teslîme mezbûre Fâtıma’ya tenbîh olunmak matlûbumdur dedikde gıbbe’s-suâl mezbûre Fâtıma cevâbında müdde‘î-i mezbûrdan ancak yedi guruşu istidâne ve kabz etmiş idim deyip ziyâde beş guruşu inkâr etmeğin müdde‘î-i merkūmdan mezbûre Fâtıma’ya müdde‘â-i mezbûrdan ziyâde-i mezbûre beş esedî guruş bundan akdem istidâne etmeyip, elân zimmetinde müdde‘î-i mesfûre deyni olduğuna yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince kabzını i‘tirâf eylediği meblağ-ı mezbûr yedi esedî guruşu müdde‘î-i merkūm Kostandil’e edâ ve teslîme mezbûre Fâtıma’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Şaban b. Abdullah, es-Seyyid Muharrem Efendi, Osman Beşe el-Muhzır ve gayruhüm.