İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 91 Hüküm no: 31 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Davud Efendi’nin Büyükçekmece’de Perastiyo köyündeki çiftliğini Hüseyin Ağa’ya sattığı Husûs-ı âti’l-beyânın mahallinde tahrîr[i] iltimâs olunmağın savb-ı şer‘-i şerîfden Mevlânâ Mehmed Efendi irsâl olunup ol dahi sâbıkan Rumeli kazaskeri oldukdan sonra vedâ‘-ı âlem-i fânî eden merhûm Abdürrahimzâde Mehmed Efendi’nin necl-i necîbi umdetü’l-müderrisînü’l-kirâm Davud Efendi’nin mahmiye-i İstanbul’da Çerağī Hamza mahallesinde sâkin olduğu menzili[ne] varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i mübîn eyledikde mûmâ-ileyh Davud Efendi’nin meclis-i ma‘kūd-ı mezbûrda kendi tarafından asîl ve zevce-i menkûhası Râbia bt. Abdullah nâm hâtun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Şaban Efendi b. Ahaveyn ve Mehmed Çelebi b. Fazlullah nâm kimesneler şehâdetleri ile şer‘an sâbit olan mefharü’l-emâcid ve’l-ekârim Hüseyin Ağa b. İsmail mahzarında ikrâr ve takrîr-i kelâm edip yedimde mülküm ve hakkım olup Havâss-ı Aliyye kazâsı müzâfâtından Çekmece-i kübrâ’ya tâbi‘ Biraşcık? nâm karyede vâki‘ ve lede’l-ahâlî ve’l-cîrân ma‘lûmü’l-hudûd hâriciyyesinde fevkānî iki bâb oda ve üç sofa ve tahtânî iki bâb oda ve kanavât-ı müsennât ile muhrez su cârî olur çeşmeyi ve üç ahır ve bir horos değirmeni ve dört anbar ve iki avluyu ve bir samanhâneyi ve dâhiliyyesinde tahtânî beş bâb oda ve bir sofa ve bir mutfak ve beş anbar kanavât-ı müsennât ile muhrez su cârî olur çeşmeyi ve bir inek ahırı ve iki fırın ve avluyu ve zât-ı eşcâr-ı müsmire ve gayr-ı müsmireyi muhtevî biri kebîr ve biri sagīr iki kıt‘a bahçeyi ve bahçe-i kebîre içinde tahmînen üç dönüm zât-ı kürüm bağı müştemil olup Pîrlepeli? Mehmed Ağa Çiftliği demekle ma‘rûf çiftliği, bi cümleti’t-tevâbi‘ ve’l-levâhık ve içinde mevcûd olan bir re’s su sığırı inek ve bir re’s kara sığır ve iki çift su sığırı öküz ve iki re’s su sığırı malağı ve yedi re’s kara su öküzü ve bir re’s siyah bârgiri ve dört arabayı ve bir kebîre kazan ve üç kapaklı tencere ve üç kapaksız tencere ve on sahan ve bir baklava tepsisi ve iki taş ve iki müsta‘mel Selânik keçesi ve bir kevgir sahan ve bir leğen ve bir ibrik ve bir süt bakracı ve iki kebîr güğüm ve bir pekmez tavası ve bir el tavası ve altı müsta‘mel minder ve üç velense ve bir kaliçe ve iki maî kilim ve beş beledî yastık ve bir maî Yanbolu kebesi ve beş sagīr sapan demiri ve bir çirçine? ta‘bîr olunur demiri ve çiftlik-i mezbûra muttasıl ma‘lûmü’l-hudûd ma‘dûdü’l-kıt‘a zikri âtî tarlalarda sâbit mellâh? tâ[ifesine] müntefe‘un-bih olan baklamı? bi safkatin vâhidetin mûmâ-ileyh Hüseyin Ağa’ya bin üç yüz esedî guruşa bey‘ ve temlîk ve merhûm Sultan Bayezid Hân -tâbe serâhû-hazretlerinin evkāfından taht-ı tasarrufumda olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve tahmînen sekiz yüz keyl tohum istî‘âb eder elli kıt‘a tarlalarımın hakk-ı tasarrufunu evkāf-ı mezbûre mütevellîsi izni ile yüz guruş bedel mukābelesinde mûmâ-ileyh Ağa’ya ferâğ ve tefvîz edip mezbûr Hüseyin Ağa dahi zevcesi müvekkile-i mezbûre Râbia Hâtun ile ale’s-seviyye müşterek olmak üzre asâleten ve vekâleten iştirâ ve temellük ve tefevvüz edip ahz? ve kabûl eylediğinden sonra semen-i mezbûr bin üç yüz guruş ile bedel-i merkūm yüz guruşu, cem‘an bin dört yüz guruşu mûmâ-ileyh Hüseyin Ağa bana edâ ve teslîm ben dahi tamâmen ahz u kabz edip zikr olunan çiftlik ve devâb ve eşyâyı ve tarlaları mahallinde zabta mûmâ-ileyh Hüseyin Ağa’yı taslît eyledim dedikde mûmâ-ileyh Hüseyin Ağa dahi mukırr-ı merkūmu cemî‘ kelimât-ı meşrûhasında tasdîk ve tahkīk etmeğin Mevlânâ-yı mezbûr mahallinde tahrîr ve ma‘an irsâl olunan Mehmed b. Mehmed ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdisi aşer min Muharremi’l-harâm li sene seb‘a ve semânîn ve elf. Şuhûdü’l-hâl: Fahrü’l-müderrisînü’l-kirâm Mehmed Efendi b. el-merhûm Murad Efendi, Mehmed Efendi b. Abdülhalim, İsmail b. Ali, es-Seyyid Mehmed Çelebi Sahhâf, Şaban Efendi b. Ahaveyn, Fahrü’l-akrân Mehmed Ağa b. Resûl, Osman Efendi b. Mehmed, Mehmed Çelebi b. Fazlullah ve gayruhüm mine’l-hâzırîn.