İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 92 Hüküm no: 32 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mehmed Efendi’nin kızından satın aldığı kölesi Vildan bt. Abdülvehhâb’ı azat edip evlendiğinin anlaşıldığı Mahmiye-i İstanbul’da Horhor çeşmesi kurbunda Kızılminâre mahallesi sâkinlerinden iken bundan akdem vefât eden Mehmed Efendi b. eş-Şeyh Ali nâm kimesnenin sulbiye kebîre kızı ve hasren vârisesi olan Kerime nâm hâtun meclis-i şer‘-i şerîfde işbu uzun boylu açık kaşlı kara gözlü Çerkeziyyetü’l-asl bâ‘isetü hâze’l-kitâb Vildan bt. Abdülvahhab mahzarında üzerine da‘vâ ve takrîr-i kelâm edip târih-i kitâbdan on dört sene mukaddem mevsûfe-i mezbûre Vildan yedimde câriye-i memlûkem olduğu hâlde babam müteveffâ-yı mezbûra hayâtında iki yüz elli esedî guruşa bey‘ ve teslîm ol dahi iştirâ ve kabz ettiğinden sonra fevt oldukda, mevsûfe-i mezbûre terekesinden olup irsen bana intikāl edip mülk-i mevrûsum olmuş iken hâlâ mevsûfe-i mezbûre bana rıkka inkıyâddan imtinâ‘ eder hâlâ mevsûfe-i mezbûreye suâl olunup rıkka inkıyâdına tenbîh olunmak matlûbumdur dedikde gıbbe’s-suâl mevsûfe-i mezbûre Vildan cevâbında müteveffâ-yı mezbûr Mehmed Efendi hayâtında beni müdde‘î-i mezbûreden semen-i mezbûre ber vech-i muharrer iştirâ ve kabz ettiğinden sonra bin yetmiş yedi senesi Cumâdelâhiresi’nin on beşinci günü malından beni tahrîr ve i‘tâk edip ben sâir harâir-i asliyye gibi hürre olduğumdan sonra nefsimi on iki bin akçe mehr-i müeccel ile şuhûd mahzarında merkūm Mehmed Efendi’ye inkâh ve tezvîc, ol dahi tezevvüc ve kabûl edip hattâ merkūm Mehmed Efendi ber vech-i muharrer beni malından tahrîr ve i‘tâk ve tezevvüc ve kabûl ettiğini şuhûd mahzarında ikrâr dahi etmişdir deyû def‘ ile mukābele edicek gıbbe’l-istintâk ve’l-inkâr mevsûfe-i mezbûre Vildan’dan def‘-i mezbûrunu mübeyyine beyyine taleb olundukda mahalle-i mezbûre sükkânından İmâm Mehmed Efendi b. Yusuf ve Şâmî Mehmed Ağa b. Ahmed nâm kimesneler li ecli’ş-şehâde meclis-i şer‘a hâzırân [olup] istişhâd olunduklarında fi’l-hakīka müteveffâ-yı mezbûr Mehmed Efendi hayâtında bin yetmiş yedi senesi Cemaziyelâhiresi’nin on beşinci günü yedinde mülkü olan mevsûfe-i mezbûre Vildan’ı malından tahrîr ve i‘tâk ettiğinden sonra mezbûre Vildan nefsini on iki bin akçe mehr-i müeccel ile şuhûd mahzarında kendiye inkâh ve tezvîc eyledikden sonra kendi dahi tezevvüc ve kabûl ettiğini bizim huzûrumuzda ikrâr ve bizi işhâd etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘iye-i mezbûre ber minvâl-i muharrer bî-vech mu‘ârazadan men‘ olunup mâ vaka‘a bi’t-taleb ketb olundu. Fi’t-tâsi‘ aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Fahrü’l-akrân el-Hâc Kemal Kethüdâ-yı Hazret-i Efendi, Zahrü’l-akrân el-Hâc Hüseyin Ağa b. Üveys, el-Hâc Mehmed b. Receb, el-Hâc Mehmed b. Ali, el-Hâc Kasım b. Receb.