İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 93 Hüküm no: 33 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arapkir Beyi İbrahim Bey’in İslâm Ağa’ya borcunu ödediğine dair hüccetin doğru olduğu Mahmiye-i İstanbul’da Hobyar mahallesi sâkinlerinden İslâm Ağa b. Ahmed nâm kimesne Dîvân-ı hümâyûn-ı sa‘âdet-makrûnda akd olunan meclis-i şer‘-i şerîfde bin yetmiş dokuz senesinde vilâyet-i Anadolu’da Arabgir kasabası beyi olan mefharü’l-ümerâ’i’l-kirâm Saçbâğī Mehmed Paşazâde bâ‘is-i hâze’l-kitâb İbrahim Bey mahzarında üzerine da‘vâ ve takrîr-i kelâm edip merkūm İbrahim Bey’e medîne-i Edirne’de bin yetmiş sekiz senesinde iki bin üç yüz guruşumu ikrâz ve teslîm ol dahi iktirâz ve kabz ettiğinden sonra meblağ-ı mezbûrun bi’d-defe‘ât bin yedi yüz otuz guruşunu yedinden ahz u kabz edip beş yüz yetmiş guruşu bâkī kalmışdı hâlâ mezbûr İbrahim Bey’e suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl merkūm İbrahim Bey cevâbında kaziyye minvâl-i muharrer üzre olduğunu ikrâr, lâkin meblağ-ı bâkī-i mezbûr beş yüz yetmiş guruşu dahi müdde‘î mezbûr İslâm Ağa’ya bin yetmiş dokuz senesi Zilka‘desi’nde kasaba-i Arabgir’de edâ ve teslîm ol dahi yedimden ahz u kabz edip hattâ merkūm İslâm Ağa meblağ-ı mezbûr iki bin üç yüz guruşu yedimden ahz u kabz ettiğini kasaba-i mezbûre kadısı olan Mehmed Efendi huzûrunda ikrâr edip hüccet-i şer‘iyye dahi tahrîr ettirmiş idi deyû mazmûnu min külli’l-vücûh takrîr-i meşrûhunu nâtık ve bin yetmiş dokuz senesi Zilka‘desi evâili ile müverrah ve merkūm Mehmed Efendi’nin hat ve hatmini hâviye hüccet-i şer‘iyye ibrâz edip mezbûr İslâm Ağa muvâcehesinde feth ve kırâ’at ve istintâk olundukda ol dahi mazmûn-ı hüccet-i mezkûreyi inkâr edicek merkūm İbrahim Bey’den mazmûn-ı hüccet-i mezkûreye beyyine taleb olundukda kasaba-i mezbûrda [10b] Câmi‘-i kebîr imâmı olup misâfiren mahmiye-i mezbûrede İshak Paşa mahallesinde sâkin Osman Efendi b. Mehmed ve Attâr Mehmed b. Ramazan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr İslâm Ağa bin yetmiş dokuz senesi Zilka‘desi’nin evâilinde kasaba-i mezbûr kadısı olan Mehmed Efendi huzûrunda mukaddemâ medîne-i Edirne’de merkūm İbrahim Bey’e ikrâz ve teslîm eylediği iki bin üç yüz guruşu merkūm İbrahim Bey yedinden tamâmen ahz u kabz ettiğini bizim huzûrumuzda ikrâr ve bizi işhâd edip merkūm Mehmed Efendi’ye işbu hücceti tahrîr ettirmiş idi biz mazmûn-ı hüccet-i mezbûreye bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için savb-ı şer‘den irsâl olunan Mevlânâ Mustafa Efendi b. Abdülaziz zikr olunan İshak Paşa mahallesinde varıp ahâlîsinden Erdebilîzâde eş-Şeyh Mehmed Efendi ve el-Hâc Ali b. Derviş ve Muslu Bey b. Murad ve İmâm Mustafa Efendi b. Mehmed ve Mustafa Çelebi b. Hamza ve Ahmed Çelebi b. Nasûh ve Attâr Hüseyin Çelebi b. Abdullah ve Şâmî İbrahim Efendi b. Ahmed ve Ali Efendi b. Mahmud ve kuyumcu Abdurrahman Bey b. Ahmed ve Müezzin Ali Çelebi b. Veli ve el-Hâc Ali b. Mahmud ve Ali Bey b. Abdullah ve el-Hâc Şaban b. İbrahim nâm kimesnelerden şâhidân-ı mezbûrân Osman Efendi ve Mehmed’in keyfiyyet-i hâllerini suâl eyledikde her biri şâhidân-ı mezbûrân Osman için adl ve makbûlü’ş-şehâdedir deyû haber verdiklerini mahallinde tahrîr ve irsâl olunan İbrahim b. Mustafa ile meclis-i şer‘a gelip alâ vukū‘ihi inhâ ve takrîr etmeğin sırren ve alenen ta‘dîl ve tezkiyye olunduklarından sonra şehâdetleri makbûle olmağın mûcebince müdde‘î-i mezbûr ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Hasan Efendi tezkire-i ûlâ, Yusuf Efendi tezkire-i sâniye, Muhzır Kasım Ağa, çavuşbaşı Murad Ağa, Kemaleddin [Kethüdâ-yı Hazret-i Efendi].