İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 94 Hüküm no: 34 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Firuze bt. Abdullah’ın ilk vasiyetinden dönüp bütün eşya ve câriyesini oğulluğu İbrahim’e vasiyet ettiği Husûs-ı âti’l-beyânın mahallinde tahrîr için bi’l-iltimâs savb-ı şer‘-i şerîf-i enverden Mevlânâ es-Seyyid Mehmed Efendi b. es-Seyyid İsmail Efendi irsâl olunup ol dahi mahmiye-i İstanbul’da Ali Paşa-yı Atîk mahallesinde sâkin Hasan Çavuş b. Mehmed’in sâkin olduğu menziline varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i mübîn eyledikde mahalle-i mezbûr sâkinlerinden olup zâtı ma‘rifet-i şer‘iyye ile ârifân Tayyib b. Habib ve Mehmed b. Hasan nâm kimesneler takrîrleri ile mu‘arrefe olan Fîrûze bt. Abdullah nâm hâtun meclis-i ma‘kūd-ı merkūmda, oğulluğu bâ‘is-i hâze’l-kitâb İbrahim Beşe b. Hasan nâm kimesne mahzarında ikrâr ve takrîr-i kelâm edip bundan akdem Ali Beşe b. Mustafa nâm kimesne vasiyy-i muhtâr olup bi emrillâhi te‘âlâ fevt olduğumda taht-ı tasarrufumda olan eşyâmın cümlesini ba‘de’l-bey‘ semeninden kifâyet mikdârı techîz ve tekfînime harc ve sarf edip bâkīsinden Hazret-i ekrem ve Nebiyy-i muhterem -sallallâhu te‘âlâ aleyhi vesellem-hazretlerinin rûh-ı şerîflerine hatm-i şerîf tilâvet ettirilip mâ‘adâsını vakf ve mahalle-i mezbûre avârızına zam oluna deyû vasiyyet etmiş idim. Vasiyyet-i mezbûrumdan rücû‘ ettiğimden sonra eşyâ-i memlûkemden işbu orta boylu açık kaşlı gök ala gözlü Rûsiyyetü’l-asl Latife bt. Abdullah nâm câriyemi ve sâkine olduğum menzil içinde olan elbise ve esâs-ı beyt ve evân-ı nühâsiyye ve gayr-ı nühâsiyye ism-i mâl ıtlâk olunur kalîl kesîr ve celîl hakīr eşyâmın [hep]sini oğulluğum mezbûr İbrahim Beşe’ye hibe-i sahîha-i şer‘iyye ile hibe ve teslîm ol dahi meclis-i hibede ittihâb ve kabûl eylediğinden sonra mevsûf[e]-i mezbûre Latife ve eşyâ-i mezkûre mukābelesinde bir Mushaf-ı şerîfini bana ivaz verip ben dahi ahz u kabz ve kabûl eyledim dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan el-Hâc Şaban b. Mustafa ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Mehmed Efendi b. Ahmed, Mahmud b. Mehmed el-Müezzin, Mustafa b. Yusuf, Mehmed b. Receb, Mehmed b. Habib, Mustafa Beşe b. Davud, Halil b. Mehmed, Mehmed b. Hasan, Seyyid Mustafa Çelebi b. es-Seyyid İbrahim ve gayruhüm mine’l-hâzırîn.