İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 96 Hüküm no: 36 Orijinal metin no: [11a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Bey ve Ali Bey ibney Pîr Veli’nin miras hususunda Abdurrahman Bey’deki alacaklarını tahsil ettikleri Vilâyet-i Anadolu’da Devrek kazâsına tâbi‘ Mud nâm karye ahâlîsinden olan Osman Bey ve Ali Bey ibney Pîr Veli nâm kimesneler taraflarından husûs-ı âti’l-beyâna vekîl olduğu yedinde olan mazmûn[u] müsbit hüccet-i şer‘iyye ile sâbit bâ‘is-i hâze’l-kitâb Mustafa Bey b. Çelebi nâm [kimesne] dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde Abdurrahman Reis nâm kimesne mahzarında üzerine da‘vâ ve takrîr-i kelâm edip karye-i mezbûre ahâlîsinden olup bundan akdem Bartın kasabasında misâfiren fevt olan Ahmed b. Halil nâm kimesne müvekkilim mezbûrân Osman Bey ve Ali Bey’in babası Pîr Veli ile li ebeveyn karındaşları olup babaları ismi Halil ve dedeleri Kuluca ve anaları ismi Ayşe ve maskat-ı re’sleri karye-i mezbûre olup müteveffâ-yı mezbûrun verâseti müvekkilân-ı mezbûrâna münhasıra olup hattâ târih-i kitâb şehîr gurresinde Mahmud Paşa mahkemesinde nâibü’ş-şer‘ olan Mehmed Efendi huzûrunda tereke-i müteveffâ-yı mezbûre vâzı‘ü’l-yed olan el-Hâc Hüseyin nâm kimesne muvâcehesinde şuhûd ve udûl ile ber vech-i muharrer verâsetini isbât edip mûcebince hükm-i şer‘î lâhık ve yedine işbu hüccet-i şer‘iyye dahi verilip ve mezbûr Ahmed ve mezbûr Abdurrahman Reis zimmetinde cihet-i karzdan hakkı olan altı yüz altmış guruşu kable’l-ahz fevt olmağla hâlâ mezbûr Abdurrahman Reis’den suâl olunup meblağ-ı mezbûru bana teslîme tenbîh olunmak bi’l-vekâle matlûbumdur deyû mazmûnu min külli’l-vücûh takrîr-i meşrûhunu nâtık ve târih-i kitâb şehîr gurresiyle müverraha ve merkūm Mehmed Efendi’nin imzâsıyla mümzât ve hatim ile mahtûme hüccet-i şer‘iyye ibrâz edip mezbûr Abdurrahman Reis muvâcehesinde feth ve kırâ’at ve istintâk olundukda mezbûr Abdurrahman Reis dahi mazmûn-ı hüccet-i mezkûrunu ikrâr, lâkin mezbûr Ahmed fevt oldukda ve benim için yüz elli guruş olmağla Habib Efendi nâm kimesne müteveffâ-yı mezbûrun ammi ve hasren vârisi olmak üzre tarafından vekîl olan Mehmed Çelebi nâm kimesne[ye] edâ ve teslîm ol dahi ahz u kabz etmiş idi deyip ziyâde beş yüz yirmi guruşunu inkâr edip ve ibn-i ah e‘um üzerine mukaddem olmağla mezbûr Abdurrahman Reis meblağ-ı mezbûr yüz elli guruşu vekîl-i merkūm Mehmed Çelebi’ye teslîm etmekle istihlâk ettiği zâhir olmağın mezbûr Abdurrahman Reis’in ikrârı mûcebince meblağ-ı mezbûr yüz elli guruşu zâmin olup müdde‘î-i mezbûre edâ ve teslîme mezbûr Abdurrahman Reis’e müdde‘î-i mezbûr ziyâde-i mezbûr için tenbîh havâle olundukdan sonra vekîl-i mezbûr Mustafa Bey meclis-i şerîfde mezbûr Abdurrahman Reis mahzarında ikrâr ve takrîr-i kelâm edip ânifen teslîmine tenbîh olunan meblağ-ı mezbûr yüz elli guruşu bana edâ ve teslîm ben dahi yedinden ahz u kabz eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Zilhicceti’ş-şerîfe li sene seb‘a ve semânîn ve elf. Şuhûdü’l-hâl: El-Hâc Ali b. Ramazan, Mahmud Reis b. Ebûbekir, Hasan Beşe b. Yusuf [bölü]k 15, Hasan Ağa b. Mustafa, Hasan Halîfe b. ( ), Mehmed Halîfe b. ( ) ve gayruhüm.