İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 97 Hüküm no: 37 Orijinal metin no: [11a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ebûbekir Ağa b. İsmail’in mukātaalı vakıf evlerini Hasan Ağa b. Osman’a satıp parasını aldığı Dârü’l-hilâfeti’l-aliyye Kostantıniyye el-mahmiye’de Paşa kurbunda Tahtaminâre mahallesi ahâlîsinden olup bundan akdem hacc-ı şerîfe tevcîh ve azîmet eden mefharü’l-emâsil ve’l-a‘yân Ebûbekir Ağa b. İsmail nâm kimesne tarafından husûs-ı âti’l-beyâna vekîl olduğu mahmiye-i mezbûrede Dizdâriye mahallesi sâkinlerinden el-Hâc Abdülbâkī b. Mehmed ve Mustafa Efendi b. Fazlullah nâm kimesneler şehâdetleri ile şer‘an sâbit olan el-Hâc Mehmed b. el-Hâc Mustafa nâm kimesne meclis-i şer‘-i şerîf-i enver ve mahfil-i dîn-i münîf-i ezherde, umdetü’l-emâcid ve’l-ekârim câmi‘ü’l-mehâmid ve’l-mekârim sâhib-i hâze’l-kitâb Hasan Ağa b. Osman tarafından husûs-ı âti’z-[11b] zikre vekîl olduğu nehc-i şer‘î ve tarîk-i mer‘î üzre şer‘an sâbit olan birâderleri fahrü’l-akrân Mehmed Ağa mahzarında ikrâr ve takrîr-i kelâm edip müvekkilim merkūm Ebûbekir Ağa arsası merhûme Mihriban Hâtun vakfından icâre-i mu‘accele ve ayda yüz elli akçe icâre-i müeccele ile taht-ı tasarrufunda ve üzerinde olan ebniyesi mülkü olup zikr olunan Tahtaminâre mahallesinde vâki‘ bir tarafdan merhûm Rüstem Paşa vakfından olup yine kendi tasarrufunda olan arsa ve bir tarafdan Mehmed Çelebi nâm kimesne tasarrufunda üç bâb menzil ve iki tarafdan tarîk-i âm ile mahdûd dâhil ve hâriciyyeyi muhtevî dâhiliyyesinin tabaka-i ulyâsında üç bâb oda ve bir köşk ve kayagan döşeme bir abdesthâne ve bir kenîf ve bir orta sofası ve tahta bend ve tabaka-i vustâsında üç bâb oda ve kayagan döşeme bir abdesthâne ve kenîf ve tabaka-i süflîsinde bir ahır ve samanhâne ve anbar ve kenîfi müştemil menzilinin ebniyesini, bi cümleti’t-tevâbi‘ ve’l-levâhık iki bin iki yüz elli esedî guruşa müvekkile-i mûmâ-ileyh Hasan Ağa’ya tarafeynden îcâb ve kabûlü hâvî bey‘-i kat‘î ile bey‘ ve teslîm ve arsasının dahi hakk-ı tasarrufunu mütevellîsi izin ve ma‘rifeti ile iki yüz elli esedî guruşa merhûm-ı mezbûr Rüstem Paşa vakfından olan ma‘lûmü’l-hudûd mârrü’z-zikr arsanın hakk-ı tasarrufunu dahi üç yüz esedî guruşa mütevellîsi izin ve ma‘rifetiyle ferâğ ve tefvîz mûmâ-ileyh Hasan Ağa dahi ebniye-i mezkûreyi iştirâ ve tesellüm ve arsateyn-i mezbûreteyni ber vech-i muharrer tefevvüz ve kabûl ettiğinden sonra menzil-i mahdûd-ı mezbûrun ebniyesi semeni olan iki bin iki yüz elli guruşu ve arsası bedeli olan iki yüz elli guruşu, cem‘an iki bin beş yüz esedî guruşu müvekkilim merkūm Ebûbekir Ağa’ya edâ ve teslîm ol dahi ahz u kabz etmiş idi min ba‘d menzil-i mahdûd-ı mezbûrun ebniyesi müvekkil-i mûmâ-ileyh Hasan Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun ve arsateyn-i mezbûreteyn dahi hakk-ı müfevvezidir emsâli gibi tasarruf eylesin dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Fahrü’l-akrân el-Hâc Kemaleddin Kethüdâ-yı Hazret-i Efendi, Zahrü’l-akrâ[n] el-Hâc Hüseyin Ağa b. Üveys, el-Hâc Abdülbâkī b. Mehmed, Mustafa b. Fazlullah, perdecibaşı İbrahim Ağa, Mustafa Çelebi, Ahmed Çelebi b. Mehmed es-sarrâc, kuyumcu Ahmed Çelebi, el-Hâc Mehmed b. Ali, el-Hâc Kasım b. Receb ve gayruhüm.