İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 98 Hüküm no: 38 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid İbrahim Efendi’nin Ahmed Efendi’ye olan borcunu ödemesi tembihi Min hattıhî. Sâbıkan Edirne kadısı oldukdan sonra vedâ‘-ı âlem-i fânî eden merhûm Velizâde Ahmed Efendi’nin vasiyy-i muhtârı olan bâ‘is-i hâze’l-kitâb Atâullâh Efendi b. Osman meclis-i şer‘-i şerîfde es-Seyyid İbrahim b. es-Seyyid Mustafa mahzarında ikrâr ve takrîr-i kelâm edip merhûm-ı mezbûr Ahmed Efendi hayâtında dört yüz esedî guruşu merkūm es-Seyyid İbrahim Efendi’ye ikrâz ve teslîm ol dahi iktirâz ve kabz ettikden sonra meblağ-ı mezbûru kable’l-ahz merhûm Ahmed Efendi vefât etmekle hâlâ merkūm es-Seyyid İbrahim Efendi’ye suâl olunup meblağ-ı mezbûru bana edâ ve teslîme merkūm es-Seyyid İbrahim Efendi’ye tenbîh olunmak bi’l-vesâye matlûbumdur dedikde gıbbe’s-suâl merkūm es-Seyyid İbrahim cevâbında kaziyye minvâl-i muharrer üzre olup meblağ-ı mezbûr dört yüz guruşu müdde‘î-i merkūm mezbûr Ahmed Efendi’ye vâcibü’l-edâ ve lâzımü’l-kazâ deyni olduğun ikrâr ve i‘tirâf etmeğin mûcebince meblağ-ı mezbûr dört yüz guruşu müdde‘î-i merkūm Atâullâh Efendi’ye edâ ve teslîme merkūm es-Seyyid İbrahim Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn mine’l-Muharremi’l-harâm sene 1087. Şuhûdü’l-hâl: İbrahim Çelebi b. Mehmed, Osman Çelebi b. ( ) kâtib-i …?, Veli b. Mahmud, es-Seyyid Muharrem b. es-Seyyid İsmail, Osman b. Ömer.