İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 99 Hüküm no: 39 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anastas v. Nikola’nın mirasçıları ile Mihalaki ve Aslan arasında dava kalmadığı Mahmiye-i İstanbul’da Nişâncı Cafer Çelebi mahallesinde sâkin iken bundan akdem vefât eden Anastas v. Nikola nâm zimmînin verâseti, zevce-i metrûkesi Eskiline nâm nasrâniye ile sulbiye sagīre kızları Kasandra ve Lipane’ye ve sulbî sagīr oğlu Kostantin ve sulbî kebîr oğlu Mihalaki’ye münhasıra olduğu şer‘an sâbit oldukdan sonra mezbûre Eskiline tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre sükkânından İstati v. Yani ve Drako v. Yanaki nâm zimmîler şehâdetleri ile şer‘an sâbit olan Hazaki v. Yorgi nâm zimmî meclis-i şer‘-i şerîfde sıgār-ı mezbûrûnun tesviye-i umûrlarına kıbel-i şer‘den mansûb vasîleri olmağla hâlik-i mezbûrun terekesine vâzı‘ü’l-yed olan mezbûr Mihalaki mahzarlarında ikrâr ve takrîr-i kelâm edip müvekkilem mezbûre Eskiline hâlik-i mezbûrun terekesinden kırk sekiz sihâmdan kendiye isâbet eden altı sehim hisse-i şer‘iyyesi mukābelesinde şerâit-i sıhhat-i sulhü hâvî mevâni‘-i müfsideden ârî bi tarîki’t-tehârüci’ş-şer‘î nukūd-i terekeden hissesinden ez-yed yüz altmış guruş üzerine hâlik-i mezbûrun terekesine vâzı‘ü’l-yed olan mezbûrân Aslan? ve Mihalaki ile sulh olup bedel-i sulh olan meblağ-ı mezbûr yüz altmış guruşu müteveffâ-yı mezbûrun terekesinden mezbûrân Aslan ve Mihalaki müvekkile-i mezbûre Eskiline’ye edâ ve teslîm ol dahi ahz u kabz ettiğinden sonra hâlik-i mezbûrun nukūd ve menkūl ve akār terekesine ve beynlerinde ma‘lûm bir çift zümrüd küpeye müte‘allika âmme-i de‘âvî ve mütâlebâtdan ve eymân ve muhâsamâtdan sıgār-ı mezbûrûnun ve mezbûr Mihalaki’nin zimmetlerini ibrâ’-i âmm-ı kātı‘ü’l-hısâm ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Osman b. Ömer, Ebûbekir b. Hüseyin, Veli b. Mahmud, Mehmed Çelebi b. Abdullah ve gayruhüm.