İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 101 Hüküm no: 41 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terbiye ve yetiştirilmesi için Hasan b. Hüseyin’e verilen Mehmed için nafaka takdiri Mahmiye-i İstanbul’da Meydankapısı kurbunda Sokullu Câmi‘i mahallesi sâkinlerinden Osman Beşe b. Mustafa nâm kimesne mahfil-i kazâda, mahmiye-i mezbûrede Aksaray kurbunda Emirli mahallesi sükkânından Hasan b. Hüseyin nâm kimesne mahzarında ikrâr ve takrîr-i kelâm edip bin seksen bir senesi Zilka‘desi’nin dördüncü günü vilâyet-i Anadolu’da medîne-i İznikmid’e nâibü’ş-şer‘ olan Halil Efendi işbu hâzır bi’l-meclis Mehmed nâm sagīri lakît olmağla tebennî ve terebbî ve iyâle için bana teslîm ve nafaka ve kisvesi için yevmî üçer akçe nafaka farz ve takdîr edip ben dahi tesellüm edip târih-i kitâba gelince sagīr-i mezbûru infâk ve iksâ etmiş idim hâlâ sagīr-i mezbûr Mehmed’i tebennî ve terebbî için mezbûr Hüseyin’e hâkim-i muvakki‘-i sadr-ı kitâb tûbâ-lehû ve hüsnü me’âb hazretleri izin ve ma‘rifetleri ile teslîm ol dahi [tesellüm] ettiğinden sonra sagīr-i mezbûra târih-i kitâba gelince masrûfum olan on bir bin iki yüz akçeden sagīr-i mezbûrun zimmetini ibrâ eyledim dedikde mezbûr Hüseyin dahi sagīr-i mezbûru ber vech-i muharrer tesellüm ettiğini i‘tirâf eylediğinden sonra hâkim-i mûmâ-ileyh sagīr-i mezbûrân nafaka ve kisve ve sâir levâzım-ı mühimmesi için yevmî üç akçe farz ve takdîr [edip] meblağ-ı mezbûru sagīr-i mezbûrun nafaka ve kisve ve sâir levâzım-ı mühimmesine sarfa ve vakt-i zarûretde istidâneye ve lede’z-zafer rücû‘a mezbûr Hüseyin’e izin vermeğin, mâ vaka‘a bi’t-taleb ketb olundu. Fi’l-yevmi’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Muharrem b. Abdullah, Veli Beşe b. Hasan, Mehmed b. Muharrem, Osman b. Ömer, Ebûbekir b. Hüseyin ve gayruhüm mine’l-hâzırîn.