İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 102 Hüküm no: 42 Orijinal metin no: [12a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Efendi’nin haksız yere aldığı para davasında Pravadi’den Hüseyin Çelebi ile anlaştığı Vilâyet-i Rumeli’nde Pravadi kasabasına tâbi‘ Yeniköy nâm karye ahâlîsinden Hüseyin Çelebi b. Durak Efendi nâm kimesne meclis-i şer‘-i şerîfde kasaba-i mezbûrda bundan akdem nâibü’ş-şer‘ olan fahrü’l-kuzât bâ‘is-i hâze’l-kitâb Ali Efendi b. Sâlih mahzarında ikrâr ve takrîr-i kelâm edip merkūm Ali Efendi kasaba-i mezbûrda nâibü’ş-şer‘ iken karındaşım Ömer nâm kimesne fevt olmağla terekesini taksîm etmek için ve bir değirmen husûsu için benim bi gayri hakkın yüz yetmiş guruşumu ahz u kabz etmekle bundan akdem meblağ-ı mezbûru merkūm Ali Efendi yedinden taleb ve da‘vâ ettiğimde ol dahi inkâr etmekle beynimizde nizâ‘-ı küllî vukū‘undan sonra muslihûn tavassut edip merkūm Ali Efendi ile beynimiz[de] doksan esedî guruş üzerine inşâ-i akd-i [sulh ettiklerinde ben dahi] sulh-i mezbûru kabûl ve bedel-i sulh olan meblağ-ı mezbûr doksan guruşu merkūm Ali Efendi yedinden [12b] tamâmen ahz u kabz ettiğimden sonra husûs-ı mezkûre ve târih-i kitâba gelince beynimizde cereyân eden hukūka müte‘allika âmme-i da‘vâdan ben merkūm Ali Efendi’nin zimmetini ibrâ ve iskāt edip ve merkūm Ali Efendi dahi bedel-i sulh-i mezbûre müte‘allika da‘vâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn mine’l-Muharremi’l-harâm li sene seb‘a ve semânîn ve elf ba‘de hicreti men lehü’l-izzi ve’ş-şeref. Şuhûdü’l-hâl: Fahrü’l-akrân el-Hâc Kemaleddin Kethüdâ-yı Hazret-i Efendi, Zahrü’l-akrân el-Hâc Hüseyin Ağa b. Üveys, Fahrü’l-küttâb Ahmed Efendi, Fahrü’l-küttâb İvaz Efendi, el-Hâc Mehmed b. Ali, el-Hâc Mehmed b. el-Hâc Receb, İbrahim Çelebi b. Mehmed ve gayruhüm mine’l-hâzırîn.